Búgin, 27 maýsym kúni QR Prezıdentiniń janyndaǵy Memlekettik basqarý akademııasynyń túlekterine saltanatty túrde dıplom tabystaý rásimi ótti, dep habarlaıdy Egemen.kz.
2024–2025 oqý jylynda Memlekettik basqarý akademııasynda 109 magıstrant pen 4 doktorant sátti dıplom qorǵap, oqýyn támamdady.
Saltanatty dıplom tapsyrý rásiminiń ashylýynda Memlekettik qyzmet isteri agenttiginiń tóraǵasy Darhan Jazyqbaı túlekterge aq jol tilep, memlekettik qyzmet júıesinde júrgizilip jatqan reformalar týraly aıtty.
Onyń aıtýynsha, Prezıdent Qasym-Jomart Toqaevtyń tapsyrmasy boıynsha qabyldanyp jatqan ózgerister aıasynda Akademııany úzdik bitirgen túlekter endi óńirlik deńgeıdegi basshylyq qyzmetterge konkýrstan tys taǵaıyndala alady.
Akademııa rektory Azamat Jolmanov túlekterdi quttyqtap, jyly lebizin bildirdi.
Sondaı-aq túlekterge dıplom tabystaý úshin arnaıy Qazaqstan Respýblıkasy Syrtqy ister mınıstriniń orynbasary Álibek Ásetuly Baqaev, Qazaqstan Respýblıkasynyń Ulttyq ekonomıka vıse-mınıstri Asan Kóbentaıuly Darbaev shaqyryldy.
Akademııada «Memlekettik saıasat» bilim berý baǵdarlamasy boıynsha magıstratýrany támamdaǵan Aısana Rahımova óńirine oralyp, memlekettik qyzmettegi eńbegin jalǵastyrmaq.
«Búgin biz úshin qýanyshty, erekshe kún. Akademııa basshylyǵyna, professorlyq-oqytýshylyq quramyna bilim alýshylarǵa bergen zor múmkindigi úshin myń alǵys. Endi Pavlodar óńirine oralyp, qyzmetimdi jalǵastyrmaqpyn», dedi Akademııa túlegi.
Atap óteıik, Prezıdent janyndaǵy Memlekettik basqarý akademııasyna 2025-2026 oqý jylyna magıstratýraǵa jáne doktorantýraǵa oqýǵa qujat qabyldaý osy jyldyń 25 maýsymyna deıin júrgizildi. Jańa oqý jylyna memlekettik qyzmetshiler úshin 132 grant (magıstratýraǵa – 120, doktorantýraǵa – 12) bólindi.