Premer-mınıstr Oljas Bektenov Eýrazııalyq damý banki keńesiniń otyrysyn ótkizdi. Qarjylyq uıymnyń byltyrǵy jumysy qorytyndylanyp, alda atqarylar ózekti máseleler qaraldy.
Otyrysta EADB basqarma tóraǵasy Nıkolaı Podgýzov 2022–2026 jyldarǵa arnalǵan strategııanyń negizgi kórsetkishteri týraly baıandady. 2024 jyldyń qorytyndysynda jınaqtalǵan ınvestısııalyq portfel 16,5 mlrd dollar deńgeıine jetti, ınvestısııalar kólemi ótken jylmen salystyrǵanda 700 mln dollarǵa ulǵaıyp, 2,4 mlrd dollar boldy. Ornyqty damý salasyndaǵy maqsattarǵa qol jetkizýge qosqan úlesi bar jobalardyń úlesi 30%-dan asty, bul nysanaly kórsetkishterden eki ese kóp. EADB tehnıkalyq qoldaýdyń jobalyq portfelin aıtarlyqtaı ulǵaıtty. Byltyr bul kórsetkish 76%-ǵa ósip, tarıhı eń joǵary deńgeıge jetti.
Basqarmanyń jyldyq esebine sáıkes banktiń Qazaqstandaǵy ınvestısııalyq portfeli 7,2 mlrd dollarǵa jetti, oǵan 116 joba, onyń ishinde quny 2,9 dollar mlrd 43 joba bar. Sondaı-aq Armenııa, Qyrǵyzstan jáne Tájikstandaǵy bastamalaryna ınvestısııalardyń ósýi de tilge tıek etildi. Bıyl EADB-nyń jınaqtalǵan portfelinde barlyǵy 305 joba bar.
Birinshi jartyjyldyqtyń qorytyndysynda bıylǵa arnalǵan ınvestısııalar jospar oryndalyp, 2,1 mlrd dollardy qurady. Daıyndyqqa basa mán berilgen jobalardyń áleýetti kólemi 4 mlrd dollardan asady.
EADB qurý týraly kelisimge О́zbekstan resmı túrde qosyldy. Otyrys barysynda О́zbekstannyń ınvestısııalar, ónerkásip jáne saýda mınıstri Lazız Kýdratov bankpen belsendi ózara is-qımylǵa daıyn ekenin jetkizdi.
Otyrys qorytyndysynda uıymdastyrýshylyq ári qarjylyq sıpattaǵy sheshimder qabyldandy. Keńes músheleriniń usynysymen Premer-mınıstr Oljas Bektenov EADB Keńesiniń tóraǵasy bolyp saılandy. Tóraǵanyń orynbasary bolyp Qarjy mınıstri Mádı Takıev taǵaıyndaldy.
Eýrazııalyq damý banki — eýrazııalyq keńistikte ınvestısııalyq qyzmetti júzege asyratyn kópjaqty damý banki. EADB portfelindegi negizgi úlesi kólik ınfraqurylymy, sıfrlyq júıeler, jasyl energetıka, aýyl sharýashylyǵy, ónerkásip pen mashına jasaý salalaryndaǵy ıntegrasııalyq jobalarǵa arnalady. Bank BUU-nyń Ornyqty damý salasyndaǵy maqsattaryn jáne ESG qaǵıdattaryn basshylyqqa alady. EADB 2022–2026 strategııasy sheńberinde «Ortalyq Azııanyń sý-energetıkalyq kesheni», «Eýrazııanyń kólik negizi», «Eýrazııalyq taýar ótkizý jelisi» syndy 3 megajobany júzege asyrady.