Petropavlda zańsyz shyǵarylǵan aktıvtermen kúres aıasynda memleketke qaıtarylǵan qarjyǵa balabaqsha salynyp jatyr. Májilis depýtattary, «AMANAT» partııasy fraksııasynyń músheleri Erkebulan Mámbetov pen Dmıtrıı Koloda nysannyń jalpy jaı-kúıi men belgilengen merzimderge sáıkestigin, qarjynyń jumsalý tıimdiligin tekserdi, dep habarlaıdy Egemen.kz.
280 oryndyq balabaqshanyń qurylysy 2025 jyldyń aqpan aıynda bastalǵan. Búgingi tańda qurylystyń shamamen 40 paıyzy aıaqtaldy. Nysan bıyl jeltoqsanda aıaqtalady dep josparlanǵan. Jalpy qarjylandyrý 1,9 mlrd teńgeni quraıdy.
«Memleketke qaıtarylǵan qarajat qoǵam ıgiligine jumsalýy kerek. Bul – «AMANAT» partııasynyń irgeli ustanymy. Biz qaǵaz júzindegi baqylaýmen shektelmeımiz, ár teńge maqsatty jumsalyp jatqanyna kóz jetkizý úshin qurylys alańdaryna ózimiz baramyz. Petropavlda jaz mezgili qysqa ekenin eskergenimiz jón. Eger aldaǵy eki aıda jumysty jyldamdatpasaq, merdigerler maýsymdyq shekteýlerge tap bolýy múmkin. Sondyqtan kúzge deıin negizgi qurylys sıklyn aıaqtaý mańyzdy», dedi D.Koloda.
Ol buǵan deıin óńirde osyndaı nysandardyń qurylysy kezinde keshigý bolyp, aýa raıynyń salqyndaýyna baılanysty merdigerler mańyzdy kezeńderdi aıaqtaı almaı qalǵanyn eske saldy. Depýtattyń aıtýynsha, bıyl mundaı jaǵdaıǵa jol berýge bolmaıdy.
«Áleýmettik nysandardy salý kezinde biz tek merzimi men sapasyna ǵana emes, smetalyq qujattamanyń quramyna da mán berýimiz qajet. Salynǵan ár teńge ulttyq ekonomıkaǵa paıda ákelýge tıis. Otandyq qurylys materıaldaryn, jergilikti kásiporyndardyń ónimderin paıdalaný – bul jaı ǵana bıznesti qoldaý emes, ol – jańa jumys oryndary, salyq túsimderi, óńirlerimizdiń damýy. Mundaı tásil «memleket – bıznes – qoǵam» turaqty tizbegin qalyptastyrady», dedi E.Mámbetov.
Depýtattar qazir Soltústik Qazaqstan oblysynda bilim berý ınfraqurylymyna erekshe kóńil bólinip jatqanyn atap ótti. «AMANAT» partııasynyń saılaýaldy baǵdarlamasy aıasynda oblysta bıýdjetke qaıtarylǵan qarajat esebinen 33 áleýmettik-kommýnaldyq ınfraqurylymdyq joba júzege asyrylýda, onyń ishinde balabaqshalar, mektepter, sport jáne medısınalyq nysandar bar.