Májilis depýtattary, «AMANAT» partııasy fraksııasynyń músheleri Murat Ábenov, Marhabat Jaıymbetov jáne Murat Ergeshbaev óńirlerge jumys sapary barysynda Qyzylordaǵa bardy. Onda UEFA standartyna saı salynyp jatqan stadıon qurylysymen tanysty. Fýtbolshylarmen kezdesken depýtattar olardyń usynys-pikirin tyńdady, dep jazady Egemen.kz.
Májilis depýtaty Murat Ábenov Memleket basshysy Býrabaıda ótken «Ulttyq quryltaıda» fýtbolǵa qatysty birqatar naqty tapsyrma bergenin atap ótti.
«Qyzylorda oblysy sol tapsyrmalardyń negizinde alǵash bolyp UEFA klassıfıkasııasy boıynsha III sanattaǵy, halyqaralyq standarttarǵa tolyq sáıkes keletin jańa stadıon qurylysyn bastap otyr. Qyrkúıek aıynda osy stadıonda úlken oıyn ótpek. Sondaı-aq oblys ákimdiginiń ustanymy boıynsha «Qaısar» fýtbol komandasy alǵash ret legıonerlersiz oınap, otandyq sportshylarǵa qoldaý kórsetip keledi. Fýtbol – kópshilikke arnalǵan sport. Sondyqtan ony nasıhattaýǵa kúsh salýymyz qajet. Sonda ǵana jastardyń sportqa degen qyzyǵýshylyǵy artady», dedi M.Ábenov.
Oblystyq dene shynyqtyrý, sport jáne týrızm basqarmasynyń basshysy Baqtııar Artaev stadıonda kásibı fýtbolshylar ǵana emes qala turǵyndary, jastar men balalardyń sportpen shuǵyldanýyna da tolyq múmkindik qarastyrylǵanyn aıtty. Stadıonda boks, kúres, sporttyq gımnastıka, aýyr atletıka, taekvondo jáne fıtnes zaldary da bolady.
Jergilikti bıýdjet esebinen qarjylandyrylǵan jańa stadıon – aımaq tarıhyndaǵy eń aýqymdy sporttyq nysandardyń biri. 11 myń orynǵa arnalǵan. Qazir trıbýnalardyń metall konstrýksııalary ornatylyp, qabyrǵalar, ishki bólmeler men syrtqy vıtrajdar qalanǵan. Sonymen qatar fýtbol alańyn jabdyqtaý, ishki árleý jáne aýmaqty abattandyrý jumystary júrgizilip jatyr. Stadıon mańynda 238 oryndyq avtoturaq, 40 oryndyq VIP avtoturaq jáne avtobýsqa arnalǵan 4 turaq qarastyrylǵan.
Kezdesý barysynda fýtbolshylar depýtattarǵa ózekti máselelerdi jetkizdi. Sonyń biri – legıonerlersiz oınaý kezinde týyndaıtyn uıymdastyrý jumystaryna qatysty qıyndyqtar. Bul máselelerdi Májilis depýtattary óz baqylaýyna alyp, Parlamentte kóteretinin aıtty.