Sońǵy aptalarda Eýropa qurlyǵy aptap ystyqty bastan keship jatyr. Londondaǵy Imperııalyq kolledj zertteýshileri taratqan málimetke súıensek, kúnniń kúrt ysýynan nebári eki aptanyń ishinde 2300-ge jýyq adam qaıtys bolǵan, dep jazady Egemen.kz.
Ǵalymdar ólim-jitimniń 12 iri qalada tirkelgenin aıtady. Olardyń qatarynda Mılan, Parıj, Barselona men London sekildi megapolıster bar. Qaıtys bolǵandardyń basym bóligi – densaýlyǵy álsiregen, jasy ulǵaıǵan azamattar. Ásirese 65 jastan asqan qarııalar arasynda qatty ystyqtyń saldary aýyr tıgen.
Maýsym aıynan beri Eýropanyń birqatar óńirinde aýa temperatýrasy 40 gradýstan tómendemeı tur. Mamandar bul qubylysty jahandyq klımattyń ózgerýimen, ormandardyń sıreýimen jáne ekologııalyq tepe-teńdiktiń buzylýymen baılanystyrady. Aǵashtardy beıbereket kesý, jasyl jelektiń azaıýy men zııandy qaldyqtardyń kóbeıýi – adamzat balasynyń óz qolymen jasap otyrǵan qateriniń bir parasy ǵana.
Sarapshylardyń pikirinshe, qalyptasqan jaǵdaıdy eńserý úshin iri qalalarda kógaldandyrý jumysyn júıeli túrde júrgizip, aýaǵa taralatyn zııandy qaldyqtardy shekteý qajet.
Birikken Ulttar Uıymy usynǵan derekter de kóńil kónshitpeıdi. Halyqaralyq uıymnyń málimetine qaraǵanda, Eýropada aptap ystyqtyń saldarynan jyl saıyn 175 myńnan astam adam qaıtys bolady. Bul ázirge – tabıǵatpen til tabysa almaǵan adamzattyń ózine ózi tóndirgen qaýiptiń naqty kórinisi.