Áskerı qyzmetker bolyp, Otanyńdy qorǵaý – joǵary mártebeli mindet. Bul salaǵa moıyn buryp, mamandyq alyp, oqaly kıim kııý úshin elimizde birneshe áskerı oqý orny jumys isteıdi. Búgin atalǵan oqý ordalaryna túsý úshin qujat qabyldaý bastaldy, dep habarlaıdy Egemen.kz.
Atap aıtqanda, talapkerlerge Saǵadat Nurmaǵambetov atyndaǵy Qurlyq áskerleriniń áskerı ınstıtýty, Talǵat Bıgeldınov atyndaǵy Áýe qorǵanysy kúshteriniń áskerı ınstıtýty jáne Radıoelektronıka jáne baılanys áskerı-ınjenerlik ınstıtýtynyń esigi aıqara ashyq. Qujat qabyldaý 31 shildege deıin jalǵasyp, qabyldaý emtıhandary 1-20 tamyz aralyǵynda ótpek. Olarǵa kásibı-psıhologııalyq irikteý, sońǵy medısınalyq tekserý, dene shynyqtyrý skrınıngi jáne mandat komıssııasy kiredi. Bıyldan bastap «Elektrondyq úkimet» (e-Gov) portalyndaǵy jeke kabınet arqyly qujat tapsyrýǵa bolady.
Bolashaq ofıserlerdi daıarlaýdyń oqý baǵdarlamalary komandalyq jáne tehnıkalyq baǵyttardan ınjenerlik baǵyttarǵa deıingi negizgi áskerı mamandyqtardy qamtıdy. Áskerı oqý oryndarynyń kýrsanttary tórt jyl memlekettik bilim berý baǵdarlamalary boıynsha oqyp, tegin jataqhanamen, shákirtaqymen qamtamasyz etiledi. Tamaǵy tegin, oǵan qosa, basqa da materıaldyq kómek kórsetiledi, sondaı-aq medısınalyq qyzmet te qarastyrylǵan.
Áskerı joǵary oqý ornyna túsý úshin azamattar turǵylyqty jeri boıynsha jergilikti áskerı basqarý organyna júginýi, arnaıy tekserýden ótýi, sondaı-aq UBT nátıjelerin usynýy qajet. Birinshi kýrsqa qabyldanǵan kýrsanttar arasynda jaqyn jáne alys shetelderdiń áskerı joǵary oqý oryndarynda oqýǵa irikteý júrgiziledi. Shetelde oqyǵysy keletinder oqý tilin bilý testinen jáne UBT nátıjeleriniń reıtıngisinen ótedi.
Áskerı oqý oryndarynda bilim alýǵa, dene shynyqtyrýǵa jáne kásibı turǵyda ósýge barlyq jaǵdaı jasalǵan. Oqýdy aıaqtaǵan túlekterge «leıtenant» áskerı ataǵy beriledi. Olar «bakalavr» akademııalyq dárejesin alý arqyly suranysqa ıe mamandyqty ıelenip qana qoımaı, jumysqa ornalasýǵa, turǵyn úımen qamtamasyz etilýge múmkindik almaq.