Qazaqstannyń qarjy monıtorıngi agenttiginiń Shymkent qalasy boıynsha departamenti «Shymkent jastar teatry» MKQK dırektory men ózge de laýazymdy tulǵalarǵa qatysty 136 mln teńgeden astam kólemdegi bıýdjet qarajatyn jymqyrý deregi boıynsha tergeýdi aıaqtaǵanyn habarlady, dep jazady Egemen.kz.
O basta memlekettik bıýdjetten konsert ótkizýge arnalǵan jabdyqtardy, ıaǵnı kolonka, sabvýfer, sahnalyq ferma, kúsheıtkish, mıkrofon sekildi buıymdardy satyp alýǵa 320 mln teńge bólingen bolatyn. Alaıda kúdikke ilingen teatr basshylyǵy tender talaptaryn buza otyryp, lottardy qoldan bólshektegen. Sóıtip 20-dan astam ataý boıynsha satyp alýdy elektrondy dúken arqyly júrgizgen. Sosyn jalǵan jeke kásipkerlermen kelisimsharttar jasasyp, qarajatty qolma-qol aqshaǵa aınaldyrǵan. Jalǵan kásipkerler elektrondy saýda alańy arqyly jabdyqty naqty jetkizbegen.
Kúdiktilerdiń biri qylmystyq jolmen tapqan aqshaǵa avtokólik pen páter satyp alǵan. Onyń jalpy quny 48 mln teńgeni qurady. Artynsha múlikti jasyrý maqsatynda olardy senimdi adamdardyń atyna rásimdegen.
Búgingi tańda sottyń sanksııasymen sybaılastyq jolmen alynǵan barlyq múlikke tyıym salynyp,kúdiktiler qamaýǵa alyndy.
Osy mekemege memleket qazynasynan jalpy somasy 320 mln teńge bólinse, teatrdyń tizginin ustaǵan kúdiktiler sonyń 136 mln teńgesin qoldy etken. Alaıda Shymkent qalasynyń ákimdigi bul qylmystyq is jastar teatry qurylmaı turyp, «Shymkent qalalyq mádenıet úıi» konserttik uıymy kezinde oryn alǵanyn málimdedi. Qazirgi tańda osy konserttik uıym «Shymkent jastar teatry» dep atalady.
Shymkent