Astana qalasynyń qylmystyq ister jónindegi aýdanaralyq soty búgin Sáken Mamashqa qatysty aıyptaý úkimin jarııalady, dep jazady Egemen.kz.
Qazaqstannyń BAÁ-degi elshisiniń burynǵy keńesshisine áıelin júıeli túrde uryp-soǵý arqyly, densaýlyqqa aýyr nemese ortasha aýyr zııan keltirmeı, materıaldyq táýeldilikte bolǵan adamǵa tán jáne psıhıkalyq azap keltirgeni úshin aıyp taǵylǵan.
Sáken Mamash zańdy nekede turǵan jubaıyna berilgen qarajatty ózi alyp, úı sharýasyna qatysty barlyq shyǵyndardy qarjylandyryp otyrǵan.
Sondaı-aq aıyptalýshy Karına Mamashqa týystary men qurbylarymen aralasýǵa tyıym salyp, onyń qońyraýlary men hat-habarlaryn, júris-turysyn baqylap otyrǵan.
«Jalǵan qyzǵanyshtyń negizinde, memlekettik qyzmetker retinde ant qabyldaǵan M. 2019–2024 jyldar aralyǵynda, Astanada jáne keıinnen BAÁ, Abý-Dabıde júrgen kezinde júıeli túrde kúsh qoldanǵan ıaǵnı judyryqpen denesiniń túrli jerlerine jáne basyna dene jaraqattaryn salǵan. Sottalýshynyń kinási jábirlenýshiniń, kýálardyń aıǵaqtarymen, saraptamalyq qorytyndylarmen, beınejazbalarmen, skrınshottarmen jáne ózge de istiń materıaldarymen dáleldendi», delingen Astana qalasynyń qylmystyq ister jónindegi aýdanaralyq sotynyń habarlamasynda.
Dese de sottalýshy kinásin moıyndamaı, aqtaýdy suraǵan. Sot jaza taǵaıyndaý kezinde jeńildetetin mán-jaılardyń joqtyǵyn, al aýyrlatatyn mán-jaı retinde sottalýshynyń ózi qabyldaǵan antty buzyp, quqyq buzýshylyq jasaǵanyn eskerip 6 jylǵa bas bostandyǵynan aıyrý jazasyn taǵaıyndady.
Úkim zańdy kúshine engen joq.