Taldyqorǵandaǵy Ilııas Jansúgirov atyndaǵy Jetisý ýnıversıtetinde Italııanyń Marke polıtehnıkalyq ýnıversıtetiniń fılıaly resmı ashyldy. Sharaǵa Jetisý oblysynyń ákimi Beıbit Isabaev, Ǵylym jáne joǵary bilim mınıstri Saıasat Nurbek jáne Italııanyń Qazaqstandaǵy elshisi Antonello De Rıý qatysty, dep habarlaıdy Egemen.kz.
Fılıal Memleket basshysynyń tapsyrmasyna sáıkes agrarlyq baǵytta «Agronomııa – aýyl sharýashylyǵy ǵylymdary men tehnologııalary» qosdıplomdy baǵdarlamasyn júzege asyrýda. Alǵashqy kezeńde oblys ákimdigi 14 grant bóldi. Stýdentterge sheteldik professorlar dáris oqıdy, zamanaýı zerthanalarda tájirıbe júrgiziledi. Oqýdy támamdaǵan túlekter qazaqstandyq jáne ıtalııalyq dıplom alyp shyǵady.
«Jetisý – agrarlyq aımaq. Sondyqtan aýyl sharýashylyǵy ǵylymyn damytatyn, eýropalyq tájirıbesi bar mamandar daıarlaý – ýaqyt talaby. Bul bastama aýylǵa bilim men ǵylymdy ákeledi», – deıdi oblys ákimi Beıbit Isabaev.
Bolashaqta taǵam ınjenerııasy, týrızm, ekonomıka jáne sıfrlyq tehnologııalar baǵytynda da jańa baǵdarlamalar ashylmaq.