Premer-mınıstr Oljas Bektenov QR Úkimeti janyndaǵy Quqyq buzýshylyqtardyń aldyn alý jónindegi vedomstvoaralyq komıssııanyń otyrysyn ótkizdi, dep jazady Egemen.kz.
Jıynda esirtkige qarsy kúres pen turmystyq zorlyq-zombylyqtyń aldyn alý, sanyn azaıtý máselesi de talqylandy.
Endi Respýblıka boıynsha maskúnemdikke qarsy kúres sheńberinde ishimdikten bas tartqan eldi mekenderdiń qozǵalysy keńeıtiletin bolady. Qazirgi ýaqytta olardyń sany 400-den asady. Osyndaı bastamalardy júzege asyryp júrgen belsendiler men ákimdikterdi de yntalandyrý usynyldy. Búginde kisi óltirýdiń jartysynan kóbi, árbir úshinshi buzaqylyq jáne tórtinshi tonaý qylmysy mas kúıde jasalady.
Oljas Bektenov esirtki taralýynyń saldarymen ǵana emes, negizgi sebepterimen de kúresýge baǵyttalǵan jańa esirtki saıasatyn ázirleýdi tapsyrdy.
Vedomstvoaralyq komıssııa otbasylyq-turmystyq qatynastar salasyndaǵy quqyq buzýshylyqtardyń aldyn alý jáne psıhologııalyq kómek kórsetý, onyń ishinde quqyq buzýshylarǵa qarsy júrgizilip jatqan jumystardyń tıimdiligi máselelerin qarady.
IIM málimetinshe, keıingi úsh jylda turmystyq zorlyq-zombylyq faktileri boıynsha ótinishter sany 35%-ǵa azaıǵan. Bul rette 2025 jyldyń basynan bergi ótken jyldyń sáıkes kezeńimen salystyrǵanda 20%-ǵa tómendeý baıqalǵan. Otbasylyq-turmystyq qylmystar sany 34,9%-ǵa qysqarǵan.
Premer-mınıstr oń dınamıkaǵa qaramastan, turmystyq zorlyq-zombylyqtyń aldyn alý máselesi eldiń otbasylyq-demografııalyq saıasatynda ózekti bolyp qalyp otyrǵanyn atap ótti.
«Memleket basshysy aıqyndaǵan «Zań men tártip» qaǵıdaty qoǵamda qandaı da bir zorlyq-zombylyqqa, qol suǵýshylyqqa jol berilmeıtinin bildiredi. Memleket basshysynyń tapsyrmasy boıynsha biz zańnamany kúsheıttik. Áıelder men balalarǵa qatysty quqyqqa qaıshy áreketter úshin jaýapkershilikti qatańdattyq», dedi Oljas Bektenov.
Premer-mınıstr zorlyq-zombylyqtyń aldyn alý, vedomstvoaralyq úılestirýdi nyǵaıtý, halyq arasynda aqparattyq jumysty keńeıtý jáne úkimettik emes uıymdarmen ózara is-qımyl jónindegi sharalar men psıhologııalyq kómek kórsetý sharalaryn kúsheıtý qajettigine nazar aýdardy.
О́tken jyly Ishki ister mınıstrliginde otbasylyq-turmystyq zorlyq-zombylyqqa qarsy kúres jónindegi mamandandyrylǵan bólimshe quryldy. Atalǵan bólimshe múddeli memlekettik organdarmen birlesip osy salada profılaktıkalyq jumys júrgizip jatyr. Quzyretti qyzmetterdiń ózara is-qımyly da uıymdastyryldy.
Turmystyq zorlyq-zombylyqtyń kýágeri bolǵan balalar máselesi de nazardan tys qalmady. Bilim mınıstrligine mundaı kúıdegi kámeletke tolmaǵandardy erte anyqtaý jáne qoldaý tetigin ázirleý tapsyryldy.
Oljas Bektenov Otbasyn qoldaý ortalyqtary jelisin damytýdyń, tıimdi sıfrlandyrýdyń jáne barlyq vedomstvolardyń turmystyq qylmystarǵa qarsy kúreste kúsh-jigerin biriktirýdiń mańyzdylyǵyn atap ótti.
Jıyn sońynda Premer-mınıstr jergilikti atqarýshy organdarǵa raqymshylyqqa ilikken azamattardy keshendi beıimdeýdi, súıemeldeýdi jáne turmystyq zorlyq-zombylyqty qosa alǵanda, olardyń qaıta qylmysqa barýynyń aldyn alýdy qamtamasyz etýdi tapsyrdy.