Bıyl qyrkúıek aıynda «Taldyqorǵan – Úsharal» magıstraldy gaz qubyrynyń qurylysy tolyq aıaqtalady. Bul týraly Jetisý oblysynyń ákimi Beıbit Isabaev Alakól aýdanyna jasaǵan jumys sapary barysynda málimdedi, dep jazady Egemen.kz.
Uzyndyǵy 302,4 shaqyrym bolatyn qubyr Aqsý, Sarqan, Alakól aýdandaryndaǵy 84 eldi mekendi tabıǵı gazben qamtamasyz etedi. Nátıjesinde 440 myńǵa jýyq turǵyn kógildir otynǵa qol jetkizedi.
Joba sheńberinde 6 avtomattandyrylǵan gaz taratý stansııasy salynyp jatyr. Qazirgi tańda olardyń 80%-y daıyn, al tórteýinde synaq jumystary júrgizilgen.
«Intergaz Sentralnaıa Azııa» AQ ókilderiniń aıtýynsha, bastapqyda qurylys 2026 jyldyń sońynda aıaqtalady dep josparlanǵan. Alaıda jobanyń áleýmettik mańyzdylyǵyna baılanysty merziminen buryn iske qosylmaq.
Aımaq basshysy bul bastama turǵyndardyń ál-aýqatyn arttyryp qana qoımaı, óńirdegi kásipkerlik pen óndiristi damytýǵa serpin beretinin atap ótti.