1 shildeden bastap «Qazsýshar» kásipornynyń qyzmetkerleriniń jalaqysy kóbeıdi. Endi olar jylý jáne elektr energetıkasy salasyndaǵy mamandarmen bir deńgeıde jalaqy alady. Bul ózgeris 25 myńnan astam qyzmetkerge qatysty. Jalaqy orta eseppen 35-50 paıyzǵa artty, dep jazady Egemen.kz.
Sý resýrstary jáne ırrıgasııa mınıstrliginiń ókili Lázzat Júsipova bul ózgeristiń mańyzyn atap ótti:
«Sý sharýashylyǵy salasynda jalaqynyń tómendigi – uzaq jyldar boıy sheshilmeı kele jatqan másele bolatyn. Endi jalaqynyń kóterilýi osy salada jumys isteıtin mamandardyń áleýmettik jaǵdaıyn jaqsartady. Bul turaqtylyqty qamtamasyz etip qana qoımaı, jastardyń da osy salaǵa kelýine yntalandyrady», dedi ol.
Sonymen qatar buǵan deıin maýsymdyq jumys istegen 279 adam turaqty jumysqa qabyldandy. Jaqyn arada taǵy 146 maman turaqty jumysqa ornalasady. Osylaısha, kásiporynnyń barlyq 425 maýsymdyq jumysshysy turaqty jumyspen qamtylady.
Budan bólek, aýyldan qala mártebesine ótken eldi mekenderde jumys isteıtin mamandardyń jalaqysyna 25% ústemeaqy qosylatyny da habarlandy.