Mádenıet jáne aqparat mınıstrligi azamattyq kelisimdi nyǵaıtý jáne etnosaralyq qatynastardy damytý baǵytyndaǵy jumystardy jalǵastyryp jatyr. 2025 jyldyń birinshi jartyjyldyǵynyń qorytyndysy boıynsha 95%-dan astam respondent eldegi etnosaralyq qatynastardy turaqty ári qolaıly dep sıpattaǵan, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Etnosaralyq qatynastar salasyndaǵy memlekettik saıasatty iske asyrý sheńberinde jyl basynan beri óńirlerde aqparattyq-túsindirý toptary belsendi jumys istep jatyr. Olardyń qatysýymen azamattardyń quqyqtyq jáne etnosaıası saýattylyǵyn arttyrýǵa baǵyttalǵan 2000-nan astam oqytý jáne aldyn alý is-sharasy ótkizilgen.
Etnomedıasııa ınstıtýtyn damytýǵa erekshe kóńil bólinip jatyr. Elimizde kásibı medıatorlar, zańgerler, pedagogtar, psıhologtar, dintanýshylar, jýrnalıster jáne qoǵam belsendileri kiretin 20-dan astam ortalyqtar men keńester jumys isteıdi. 2025 jyldyń alǵashqy jartysynda olar 500-ge jýyq is-shara ótkizip, oǵan 22 myńnan astam adam qatysqan.
Bıyldan bastap eldegi 14 joǵary oqý ornynda jýrnalıstıka mamandyǵy boıynsha oqıtyn stýdentterge arnalǵan «Etnosaıası saýattylyq» atty jańa pán engizildi. Bul jýrnalısterdiń medıa keńistikte etnostyq taqyryptarǵa jaýapkershilikpen qaraýǵa, turaqty mádenıetti qalyptastyrýǵa septesedi.
Etnosaralyq qaqtyǵystardyń aldyn alý boıynsha Qazaqstan halqy Assambleıasy janyndaǵy Analar keńesi belsendi ról atqaryp jatyr. Búginde 1700-den astam osyndaı uıym jumys isteıdi. Olar adamgershilik qundylyqtardy nasıhattaýǵa jáne otbasylyq tárbıeni nyǵaıtýǵa baǵyttalǵan jobalardy júzege asyryp keledi. Sonymen qatar, jarty jyl ishinde 300-den astam máseleni qarastyryp, 200-den astam usynys jasaǵan Aqsaqaldar keńesi de tıimdi jumys jasap jatyr.
«Jomart jan» ortalyqtarynda 340-tan astam mesenat, volonter men qoǵam qaıratkeri birigip, qaıyrymdylyq baǵyt boıynsha jumys jasap keledi. Olar jyl basynan beri 500-den astam is-shara uıymdastyryp, jalpy somasy 304 mıllıon teńgeden astam kómek kórsetken.
Azamattyq jaýapkershilik mádenıetin qalyptastyrýǵa ekologııalyq aksııalarǵa qatysýshylar da aıtarlyqtaı úles qosyp júr. «Taza Qazaqstan» jalpyulttyq bastamasy aıasynda 300 myńnan astam etnomádenı birlestik ókilderi, jastar men volonterler qatysqan túrli is-sharalar uıymdastyrylǵan.