Prezıdent Qasym-Jomart Toqaev Soltústik Qazaqstan oblysynyń ákimi Ǵaýez Nurmuhambetovty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaevqa aımaqtyń bıylǵy birinshi jartyjyldyqtaǵy áleýmettik-ekonomıkalyq damýy jóninde esep berildi.
Memleket basshysyna maıly jáne jem-shóp daqyldarynyń egistik kólemi ulǵaıǵany týraly baıandaldy. Ákimniń aıtýynsha, tuqym jańartý deńgeıi 11,2 paıyzǵa jetken, sý únemdeý tehnologııalary belsendi engizilip jatyr. «Keń Dala 2» baǵdarlamasy aıasynda sharýalarǵa 97 mıllıard teńge bólingen. Bıyl memlekettik qoldaý aýqymy byltyrǵymen salystyrǵanda 24 paıyzǵa artqan.
Prezıdentke Soltústik Qazaqstan oblysy elimizde sút óndirisi boıynsha alǵashqy úshtikke kiretini, sonyń ishinde sút óndirý keshenderiniń sany jaǵynan kósh bastap turǵany aıtyldy.
Ǵaýez Nurmuhambetov oblysta jalpy somasy 893 mıllıard teńgeni quraıtyn 52 ınvestısııalyq joba júzege asyrylyp jatqanyn jetkizdi. Nátıjesinde 7,5 myń jańa jumys orny ashylmaq.
Bıyl 332 myń sharshy metr turǵyn úıdi paıdalanýǵa berý josparlanǵan. Qazirgi tańda 5 kópqabatty úı tapsyryldy. Jyl sońyna deıin taǵy da 11 nysannyń qurylysy aıaqtalady. Áleýmettik osal topqa jatatyn azamattar úshin bıyl 258 páter satyp alynady.
«Keleshek mektepteri» ulttyq jobasy aıasynda Petropavl qalasynda 600 oryndyq jańa zamanaýı mektep salyndy. Sonymen qatar 280 oryndyq balabaqshanyń qurylysy júrgizilýde. Densaýlyq saqtaý salasynda aýyldyq jerdegi 46 medısınalyq nysan jańǵyrtyldy. О́ńirge medısına mamandaryn tartý maqsatynda júıeli jumys atqarylyp jatyr.
Prezıdent jıyn-terin naýqanyna daıyndyqtyń, agroónerkásip salasyndaǵy ınvestısııalyq jobalardy ýaqtyly júzege asyrýdyń mańyzyna nazar aýdardy. Sondaı-aq Petropavldaǵy 2-JES-ti jóndeý jáne jylýmen, energııamen qamtamasyz etý jelilerin rekonstrýksııalaý jumystaryn jyldam aıaqtaý qajet ekenin eskertti.