5 tamyz – Medıasııa kúni. Bul kún elimizde 2011 jyly qabyldanǵan «Medıasııa týraly» Zań aıasynda atap ótiledi, dep habarlaıdy Egemen.kz.
Qoǵamdaǵy daý-damaı men kelispeýshilikti sotqa jetkizbeı sheshýge múmkindik beretin balama tetik retinde medıasııa ınstıtýty jyldan-jylǵa damyp keledi.
Sarapshylardyń aıtýynsha, daýlasýshylar arasyndaǵy ózara túsinistik pen kelisimge negizdelgen bul tásil áleýmettik turaqtylyq pen azamattyq tatýlyqty nyǵaıtýǵa aıryqsha yqpal etip otyr.
Medıasııa – taraptardyń múddesin eskeretin, beıbit kelisim arqyly daý sheshýdiń ádisi. Bul rásimniń basty artyqshylyqtarynyń biri – ýaqyt únemdeıdi, shyǵyn az bolady jáne qupııalylyq saqtalady. Medıatorlar tek kelissóz júrgizip qana qoımaı, eki jaqtyń ortaq múddesin tabýǵa baǵyttalǵan ádistemelerdi qoldanady.
Ádilet mınıstrliginiń málimetinshe, bıylǵy alǵashqy jartyjyldyqta respýblıka boıynsha 15 myńnan astam daýly is medıasııa arqyly sheshilgen. Bul kórsetkishtiń jyl saıyn artyp kele jatqany baıqalady.
Medıasııa tetigi negizinen otbasylyq, eńbek, azamattyq jáne keı jaǵdaıda qylmystyq isterde qoldanylady. Ásirese, otbasylyq janjaldar men kórshiler arasyndaǵy daý-damaı, eńbek qatynastary boıynsha túsinispeýshilikterdi sotsyz retteý tájirıbesi keń óris alyp otyr.
— Qazirgi qoǵamda medıasııa mádenıetin qalyptastyrý mańyzdy. Bul – ár azamattyń quqyǵy men jaýapkershiligin sezinýine, daý týyndaǵan jaǵdaıda bir-birin tyńdap, ortaq sheshimge kelýine kómektesetin qural. Qazir elimizde kásibı medıatorlar sany 3 myńnan asty. Bul kórsetkish medıatorlarǵa degen suranystyń artyp kele jatqanyn kórsetedi, — deıdi kásibı medıator, zańger Sara Qapanova.
Sońǵy jyldary medıasııa ınstıtýtyn aýyl-aımaqtarda damytýǵa erekshe kóńil bólinýde. Oblystyq sottar janynan tatýlastyrý ortalyqtary ashylyp, jergilikti turǵyndarǵa quqyqtyq kómek kórsetilýde. Sonymen qatar, ardagerler keńesi men analar alqasy sekildi qoǵamdyq uıymdar da tatýlastyrý úrdisine belsendi aralasa bastady.
Máselen, Jambyl oblysynyń Baızaq aýdanynda 2024 jyly 150-den astam is medıatıvtik tártippen sheshilse, onyń 70 paıyzdan astamy otbasylyq-turmystyq janjaldar bolǵan. Bul – aýyl turǵyndary arasynda da balama sheshim izdeý mádenıetiniń qalyptasyp kele jatqanyn bildiredi.
Elimizde medıasııa ınstıtýtyn damytý jóninde arnaıy jol kartasy ázirlengen. Joǵarǵy Sot, Ádilet mınıstrligi, kásibı qaýymdastyqtar men úkimettik emes uıymdar birlesip, quqyqtyq mádenıetti arttyrý, halyqqa qoljetimdi aqparat berý baǵytynda jumys júrgizýde.
— Medıasııa – tek daýdy sheshý ǵana emes, qoǵamda senim men ózara qurmetke negizdelgen qarym-qatynasty ornyqtyrýdyń tıimdi joly. Memlekettiń basty maqsaty – sot salasyndaǵy júktemeni azaıta otyryp, azamattardyń ózara ymyraǵa kelýine jaǵdaı jasaý, — deıdi Joǵarǵy Sot janyndaǵy Sottardyń qyzmetin qamtamasyz etý departamentiniń ókili Nurlan Esen.
Medıasııa kúni – tek kásibı mereke emes, azamattyq qoǵamdy damytýdyń jáne quqyqtyq sanany arttyrýdyń bir kórinisi. Qoǵamdyq kelisim men turaqtylyqqa bastaıtyn osy jolda medıatorlar eńbeginiń mańyzy zor. Medıasııa – búginniń de, keleshektiń de mádenıeti.