Jaqynda ǵana Alataýdyń arǵy betindegi aıyr qalpaqty aǵaıyn arasyna barǵan álemge tanymal Dımash Qudaıbergen Qyrǵyzstannyń halyq ártisi ataǵyn alyp, mereıi ósip qaıtqany belgili.
Onda halyqaralyq mýzyka festıvali uıymdastyrylsa, osy joly Qyrǵyzstanda dástúrli mádenıet pen mýzykaǵa arnalǵan alǵashqy «Rýh-sanaty» dúnıejúzilik festıval baıqaýynda el mereıi taǵy da ústem shyqty.
Dástúrli óner salasyndaǵy iri halyqaralyq festıvalǵa 37 elden kelgen júzden astam oryndaýshy qatysty. Qazylar alqasynyń quramynda túrli elderden kelgen tanymal mýzyka zertteýshileri, etnograftar men óner sheberleri boldy. Olar qatysýshylar oryndaǵan shyǵarmalardyń túpnusqasy saqtalýyn, dástúrli mýzykalyq aspaptardy meńgerý deńgeıin jáne ulttyq mádenı dástúrlerdiń saqtalýyn baǵalady.
Qazaqstan atynan festıvalǵa K.Baıseıitova atyndaǵy Qazaq ulttyq óner ýnıversıtetiniń stýdenti Saltanat Ersultan qatysty. Saltanat «Dástúrli án» baǵyty boıynsha 3-kýrsta oqıdy.
Baıqaý barysynda Saltanat Asan qaıǵynyń tolǵaýyn, Nartaıdyń termesin jáne Elmura Jańabergenniń «Aralym» atty shyǵarmasyn oryndady. О́nerpaz qylqobyzda jyr-terme oryndap, qazylar alqasyn tánti etti. Osylaısha, ol jeke oryndaýshylar arasynda birinshi oryndy ıelendi.
Dástúrli mádenıet pen mýzykany saqtaý jáne damytý – ulttyq murany keler urpaqqa nasıhattaýdyń biregeı joly. Mundaı jas daryndardyń jetistigi jańa býynǵa shabyt syılap, halyqaralyq mádenı baılanystardy nyǵaıta túseri sózsiz.