Oljasy mol doda

Halyqaralyq ústel tennısi federasııa­synyń (ITTF) kúntizbesindegi saıys 2028 jyly Los-Andjeleste ótetin Paralımpııa oıyndary men álem chempıonatyna izashar týrnır boldy. Elorda tórin dúbirge bólegen saıysta elimizdiń para tennısshilerinen bólek, Malaızııa, Úndistan, Fransııa, Gonkong, Belgııa, Japonııa, Ońtústik Koreıa, Polsha, Germanııa, Bolgarııa, Ulybrıtanııa, Túrkııa syndy 15 elden kelgen 138 sportshy baq synady. Olar jeke, juptyq synda tartysqa túsip, júldelerdi bólisti. 

Jankúıerler úmitin arqalap shyqqan 39 sportshymyz 15 júlde oljalady. 5 kúnge ulasqan  týrnırde sańlaqtarymyz 1 kúmis, 4 qola,  juptyq, aralas juptyq saıys­tan 2 altyn, 4 kúmis, 4 qola medal ıelendi. Qazaq sportynyń tarıhyndaǵy alǵashqy altyn medaldy erlerdiń juptyq básekesin­de Parıj Olımpıadasyna qatysýshy Álı Maqulbekov beıtarap sportshy Tımýr Hýsnýllınmen (MD14 sanaty) birge aldy. Sondaı-aq XD4 sanatynda aralas juptyq saıysta Alena Kýtatıvna beıtarap sportshy Dmıtrıı Lavrovpen kúsh biriktirip, halyqaralyq dodanyń chempıony atandy.

Bir sportshy birneshe saıys túrinde júldege talasqandyqtan, birneshe medal oljalaǵan otandastarymyz mereıimizdi tasytty. El quramasyndaǵy eń qart oıynshy 79 jastaǵy Galııa Bespalaıa jeke synda da, ári  aralas juptyq saıysta da kúmis medaldy ıelendi. Budan bólek,  Álı Maqulbekov (1 altyn, 1 qola), Altynaı Erjanqyzy ­(2 kúmis, 1 qola), Marat Surtybaev (1 kúmis, 1 qola) sheberligimen daralandy. Arýjan Gınııatova, Erjan Jaqanov, Ashat Tajmıev, Aıgúl Nasıhatova, Mahanbet Nasıhan, Raýshan Orynbaeva, Mádı Omaqov alǵash  ret «ITTF World Para Challenger» dodasynyń medalin enshiledi.

Paraústel tennısinen «ITTF World Para Challenger» týrnıri burynyraqta Polsha, Brazılııa, Chernogorııa, Slovenııa, Qytaı elderinde ótti. Halyqaralyq paraústel tennısi federasııasynyń basshylyǵy elorda tórindegi tartys joǵary deńgeıde uıymdastyrylǵanyna alǵysyn bildirdi. Endi týrnır jyl aıaǵyna deıin BAÁ men Mysyrda ótedi.