Fınlıandııanyń Helsınkı qalasynda halyqaralyq kınologııalyq federasııanyń (FCI) uıymdastyrýymen «World Dog Show 2025» dúnıejúzilik ıtter kórmesi ótip jatyr. Qazaq tazysy jahanǵa alǵash ret ıt tuqymy retinde resmı tanystyryldy.
Álem nazaryn aýdarǵan aýqymdy sharaǵa elimizdiń delegasııasy qatal talaptan ótkizilip, halyqaralyq sharaǵa qatystyrýǵa meılinshe úıretilgen 8 tazy tuqymyn apardy. Jer júziniń ár qıyrynan jetkizilgen 25 myń ıt tuqymynyń arasyna qazaq tazysy da derbes ıt tuqymy retinde endi.
Qazaqy qumaı tazylar alǵash ret kórmege qatysqanyna qaramastan, qanjyǵasy maılandy. Bıylǵy álemniń eń jas chempıony atalymy Temirlan atty tazyǵa buıyrsa, Lashyn men Arý da álem chempıony ataǵyn aldy. Kókserek pen Panaǵa kúmis júlde tıdi. Budan syrt Lashyn men Arý tazylarǵa Fınlıandııa chempıony degen de marapat berildi.
Jahandyq kórmede elimizdiń delegasııasy at baılaǵan ordasy tamashalaýshylardyń nazaryn aýdaryp, súıispenshiligine bólendi. Ulttyq naqyshta jabdyqtalǵan pavılonǵa kelýshilerdiń shoǵyry qalyń boldy. Kelýshilerge Qazaqstan kınologtar odaǵynyń ókilderi tazy tuqymynyń bekzada bolmysy men shyǵý tarıhyn baıandap, maǵlumat berdi. Qazaq halqy tazy ıtti er jigititń serigi, jeti qazynan biri dep sanaıtynyn aıtty.
Memleket basshysynyń tapsyrmasymen qazaqy tazyny saqtaý men dáripteý 2022 jyldan beri Prezıdent Is basqarmasynyń jetekshiligimen júrgizilip keledi. Úsh jyl ishinde Qazaqstan kınologtary odaǵymen birlesip, osy baǵytta birqatar aýqymdy jumys atqaryldy. 2023 jyly tamyz aıynda Qazaqstan kınologtary odaǵy FCI-dyń tolyqquqyly músheligine ótip, ulttyq ıt tuqymdaryn halyqaralyq arenada tanystyrý quqyna ıe boldy. Al byltyrǵy mamyrda Astanada ótken monotuqymdy ıtter kórmesi kezinde FCI komıssııasy 100 tazyny zerttedi. Sonymen qatar byltyr 3 qyrkúıekte Amsterdamda «qazaqy tazy» tuqymyn ádepki taný týraly sheshim shyǵyp, Qazaqstanǵa onyń tolyqqandy ıesi degen mártebe berildi.
Tazy tuqymyn damytý, halyqaralyq saıystarǵa belsendi túrde qatystyrý syndy sharttar oryndalǵan jaǵdaıda 2034 jylǵa qaraı ony tolyqtaı taný týraly sheshim shyǵýǵa tıis. «World Dog Show 2025» kórmesine qatysyp, Helsınkıde tazylardy resmı túrde jurt nazaryna usyný – osy baǵyttaǵy mańyzdy qadamdardyń biri.