Rınat Serikulynyń mamandyǵy – zańger. Biraq joǵary oqý ornyn támamadaǵan soń eńbek jolyn qurylys salasynda bastady. «Buǵan uzaq jyl qurylysta jemisti jumys istegen ákemniń tálimi áser etti», deıdi ózi. Búginde irgeli BI-group qurylys kompanııasynda bólim basqaratyn mamanmen zaýyttaǵy qarbalas jumys arasynda tildestik. Biz barǵanda jumysshylar kezekti blokty quıyp, jóneltýge daıarlap jatty.
– Áńgimemizdi kúndelikti jumys jaıynan bastasaq.
– Brıgada eki aýysymmen jumys isteıdi. Kúndizgi aýysymdaǵylardyń keshke deıin ázirlegen blogin túngi aýysymǵa shyǵatyn jumysshylar jalǵastyrady. Eń aldymen bloktyń, ıaǵnı kópqabatty úı páterleri bólmesiniń qalybyna armatýra toqylady. Odan keıin beton quıylyp, keptiriledi. Esik, terezesi salynyp, jınaqtaýshy top kem-ketigin bútindep, árleıdi de montajdaýǵa jiberiledi. Qurylys basynda daıyn bólmeler belgili bir tártippen qalanyp, kópqabatty úı ósip shyǵady.
– Sizdiń joǵary oqý ornyn zańger mamandyǵy boıynsha támamdap, baǵyńyzdy qurylys salasynda synaǵanyńyz tańdandyryp otyr.
– Ákem bala kúninen qurylysshy bolýdy qalap, osy salanyń bilikti mamanyna aınaldy. Sol kisiniń eńbek jolyna qatty qyzyqtym. Jalpy, árkim óz salasynyń maıtalmany bolǵanda ǵana qurmetke bólenedi, ataq ta alady, ortasyna da syıly bolady. Ákem sondaı kisi boldy. Sonyń yqpaly shyǵar, men de zańgerlikti emes, qurylysty tańdadym.
– Balalaryńyz sizdiń jolyńyzdy jalǵap, qurylysshy bolǵysy kele me?
– Alty balamyz bar, solardyń ishinde qyzdarym ǵana ázirge qurylys, onyń ishinde dızaın mamandyǵyn tańdap, keleshekte osy kásipte eńbek etýge talpynyp júr. Uldarym basqa mamandyqty tańdaıtyn sekildi, qalaýlary bilsin. Biz eshqashan májbúrlep, myna mamandyqty ıger demeımiz.
Jalpy, Astana qalasyndaǵy birneshe kórkem stıl, ózgeshe dızaındaǵy turǵyn úı keshenderiniń salynýyna bizdiń de septigimiz tıdi. Balalarym synybynda apaıyna, dostaryna: «Mynaý meniń ákemniń salǵan úıi, ǵımaraty», dep maqtanyshpen aıtady eken. Sony estigende tóbem kókke jetkendeı boldy.
– Jas mamandardyń qurylys órisine qyzyǵýshylyǵy qanshalyqty?
– О́te qarqyndy ne bolmasa tym baıaý dep te aıtýǵa kelmeıdi. Jalpy, jastarǵa qaraǵanda orta býyn ókilderiniń qurylysta jumys isteýge degen suranysy joǵary. Keıingi tolqyndy qyzyqtyra bilý kerek shyǵar. Aqparattyq nasıhat júrgizilip, kolledjderde, joǵary oqý oryndarynda qurylys salasynyń mamandyǵymen bilim alýshy jastardy zaýyttarǵa, qurylys nysandaryna aparyp kórsetip, tájirıbeli qurylysshylarmen kezdesý uıymdastyrsa, jumysshy mamandyqtarǵa qyzyǵýshylyq artpasa kemimes edi. Menińshe, jastardyń kóz aldyna qurylys salasy dese, laı batpaq shylap, qysh kóteretin aýyr jumys elesteıdi. Bizdiń zaýytta barlyq úderis zamanaýı tehnologııamen qamtylǵan, kompıýtermen basqarylady. Eńbekaqy naryq talabyna saı eseptelip, aı saıyn keshikpeı beriledi, zaýyttan úıge deıin tasymaldaıtyn kólik bar. Arnaıy kıim, qural-jabdyqpen qamtamasyz etedi. Tek bilek túrinip, erinbeı eńbek etseń jetkilikti. Qurylys – elimizdiń eń qarqyndy damyp kele jatqan salasy. Keleshekte jastarymyz aldyńǵy býyndy almastyryp, osy isti ary qaraı jalǵaýy kerek. Sondyqtan da keıingi tolqyndy qurylysta eńbek etýge shaqyramyn.
Áńgimelesken –
Qýanysh NURDANBEKULY,
«Egemen Qazaqstan»