Taılandtyń Bangkok qalasynda bokstan jastar arasynda Azııa chempıonaty máresine jetti. 22 jasqa deıingi boksshylar arasynda 5 boksshymyz fınalǵa shyǵyp, 3 altyn, 2 kúmis medal oljalady.
Túbit murty tebindegen jastardy qurlyq birinshiligine bilikti maman, Beıjiń Olımpıadasynyń chempıony Baqyt Sársekbaev bastap barǵan edi. Shákirtterin otty sózimen jigerlendirgen bapker Azııa chempıonatyna qatysty pikirin aıtty. «Qurlyq dodasyna ázirlik josparǵa saı ótti. Jigitterdiń qalaı judyryqtasqanyn kórdińizder. Fınalǵa deıin jetip, jekpe-jekte baryn salǵan, jalpy Bangkok rınginde óner kórsetken boksshylardyń eńbegin joǵary baǵalaımyn. Bes boksshynyń úsheýine altyn medal buıyrdy, kúmis júldeger atanǵan shákirtterime de razymyn. Bulardyń keleshegi alda. Buǵan toqmeıilsýge bolmaıdy, aldaǵy kúnderi qatelikti qaıta súzgiden ótkizip, kem-ketikti bútindeımiz. Baby kem soqqan boksshylardy shyńdaı túsemiz. Jigitterdiń barlyǵy da tehnıkalyq, taktıkalyq turǵydan da qatelik jibergen joq», dedi B.Sársekbaev.
Baqyt Sársekbaev baptaǵan jigitterdiń arasynan 60 kg salmaqta Nurıslam Qaldybaev fınalda ózbekstandyq Shohrýh Abdýmalıkovty 3:2 esebimen eńserdi. 80 kg salmaqta Sanjaráli Begalıev te altyn júlde úshin ótken tartysty jekpe-jekte ózbek Rahmatýllo Boımatovtan basym tústi. 90 kg salmaqta Temirlan Muqataev Shahzod Polvonovty utty. 65 kg salmaq dárejesinde Ilıa Kalının men 70 kg salmaqta Nurbek Mursal kúmis medaldy mise tutty.
22 jasqa deıingi qyzdar dodasy da básekege toly boldy. 4 qyzymyz fınalǵa shyǵyp, 48 kg salmaqta Gúlnaz Bóribaeva chempıon ataǵyna qosa týrnırdiń úzdik boksshysy marapatyn da aldy. 70 kg salmaqta barlyq qarsylasyn aıqyn jeńgen Baqyt Seıdish te altynmen aptaldy. Shuǵyla Nálibaı (70 kg) men Ásel Toqtasyn (+80 kg) kúmis júlde enshiledi.
Al Jangeldi Ahmetov baptap qosqan 19 jasqa deıingi burymdy boksshylar 1 altyn, 1 kúmis, 5 qola júldemen oraldy. 80 kg salmaqta Quralaı Eginbaıqyzy qurlyq chempıony atandy. Aıajan Ermek (57 kg) – kúmis, Aıym Tánkıeva (51 kg), Janel Imantaeva (54 kg), Alına Qudaıgenova (60 kg), Aqbota Esimbekova (65 kg), Sabına Jaqsylyq (+80 kg) qola júldeger atandy.
19 jasqa deıingi erler quramasyn Maqsat Baqtybazarov baptap qosyp, shákirtteri 1 altyn, 4 kúmis, 1 qola júldeni oljalady. 90 kg salmaqta Rasýl Assanhanov altyn alsa, Ádilet Tortýbek (60 kg), Bıbarys Áshirbaı (70 kg), Tımýr Taıbekov (80 kg), Nursultan Qystaýbaı (85 kg) fınalda súrinip, kúmisti mise tutty, al jartylaı fınalǵa jetken Nursultan Shildebaı (75 kg) qola medal ıelendi.