Memleket basshysynyń tapsyrmasyna sáıkes 2023 jyldan bastap mektepke deıingi uıymdarda «Quzyrettilik ortalyqtary» pılottyq jobasy iske qosylyp, ozyq pedagogıkalyq tájirıbeni engizý, tárbıeshilerdiń biliktiligin arttyrý jáne ata-analar, pedagogtar men mektepke deıingi uıymdar arasyndaǵy yntymaqtastyqty nyǵaıtý alańyna aınaldy, dep habarlaıdy Egemen.kz.
Elimizde 330 Quzyrettilik ortalyǵy jumys isteıdi, onyń 180-i qalalarda, 150-i aýyldyq jerlerde ornalasqan.
Oqý-aǵartý mınıstrliginiń málimetinshe mektepke deıingi jáne orta bilim berý baǵdarlamalaryn úılestirý maqsatynda 202 Quzyrettilik ortalyǵy tirek mektepke deıingi uıymdar mártebesine aýystyrylyp, tirek mektepterge bekitildi. Balabaqshalar, keńes berý pýnktteri jáne mektepter arasyndaǵy ózara is-qımyldyń qadamdyq jospary ázirlengen, bul – oqý-tárbıe prosesinde sabaqtastyqty qamtamasyz etýge múmkindik beredi.
Quzyrettilik ortalyqtary balalardyń qyzyǵýshylyqtaryn eskere otyryp, transformasııalanatyn pándik-damytý ortasyn jasaıdy, bilim berý prosesin oıyn túrinde uıymdastyrady jáne tirek mekteptermen tıimdi ózara is-qımyl ornatady.
«Quzyrettilik ortalyqtary jelisin damytý – mektepke deıingi bilim berýdi jańǵyrtýdyń mańyzdy qadamy. Bul balalarǵa sapaly, ıkemdi jáne zamanaýı mektepke daıarlyqty qamtamasyz etýge, al pedagogtarǵa – jańa bilim alyp, úzdik tájirıbelermen bólisýge múmkindik beredi», dep atap ótti Mektepke deıingi bilim berý departamentiniń dırektory Manara Adamova.