Túrkistan oblystyq «Eńbek mobıldiligi ortalyǵynyń» uıymdastyrýymen Saýran aýdany, Oranǵaı aýylynda óńirdegi jumyssyz azamattar men jastarǵa arnalǵan bos jumys oryndary jármeńkesi ótti. Jármeńkege Túrkistan, Kentaý qalalary men Saýran aýdanynan 30 jumys berýshi qatysyp, 700-den astam bos jumys ornyn usyndy, dep habarlaıdy Egemen.kz.
Nátıjesinde, 300-ge jýyq turǵyn jumys berýshilermen tikeleı suhbattasyp, mamandyqtaryna sáıkes jumysqa ornalasýǵa múmkindik aldy. Jalpy ónerkásip salasynda 445 jumys orny, aýyl sharýshylyǵy salasynda – 33, qurylys pen turǵyn úı kommýnaldyq sharýashylyǵy salalarynda – 150, bilim – 38, densaýlyq saqtaý – 14, qyzmet kórsetý salasynda 96 jumys orny usynyldy. Olardyń qatarynda farmasevt, nevropatolog, travmatolog-ortoped, bala dárigeri, psıholog, logoped, mádenı sharalar uıymdastyrýshy, kitaphanashy, baǵban, shashtaraz, sý sorǵy stansııasy mashınısi, sanıtar, ınjener, aýdarmashy, esepshi, zańger, mehanık, elektrık, dánekerleýshi, operator, tehnolog, júrgizýshi, pedagog, tárbıeshi, tiginshi, aspaz, laborant, kúzetshi, IT mamany jáne ózge de 70-ten astam mamandyq túri bar.
Aıta keteıik, jyl basynan beri óńirlik jumyspen qamtý kartasy aıasynda 74630 azamat turaqty jáne sýbsıdııalanatyn jumys oryndaryna joldanǵan. Onyń ishinde, turaqty jumys ornyna 36415 azamat ornalassa, sýbsıdııalanatyn jumys oryndaryna 38215 azamat joldanǵan.