Uly Jeńistiń 70 jyldyǵy qarsańynda Ońtústik Qazaqstan oblystyq soty ǵımaratynyń aldynda oblystyq sottyń tóraǵasy Nurserik Sháripovtiń bastamasymen Uly Otan soǵysy ardagerlerine arnalyp ornatylǵan Dańq taqtasy ashyldy. Memorıaldy taqtanyń ashylý rásimine ardager-sýdıalar, UOS ardagerleriniń týystary men oblystyq sottyń sýdıalary jáne BAQ ókilderi qatysty.
Dańq taqtasynda Ońtústik Qazaqstan oblysynan Uly Otan soǵysyna qatysyp, soǵystan aman-esen oralǵan soń, oblystyń sottarynda sýdıa jáne tóraǵa bolyp qyzmet etken 24 ardager-sýdıanyń esimderi jazylǵan.
Oblystyq sottyń ujymy jyl saıyn soǵys ardagerlerine syı-qurmet kórsetip, olardyń esimderin máńgi este saqtaýǵa baǵyttalǵan túrli is-sharalar ótkizip turady. Mysaly, 2014 jyly oblystyq sottyń bastamasymen Uly Otan soǵysynyń ardageri, Atyraý, Ońtústik Qazaqstan oblystyq sottaryn uzaq jyldar basqarǵan oblystyń qurmetti azamaty, zańger-jazýshy Nyǵmet Tólendiulynyń burynǵy turǵan úıine memorıaldy taqta ornatyldy jáne Shymkent qalasynyń bir kóshesine onyń esimi berildi. Bıyl barlyq aýdandyq jáne oǵan teńestirilgen sottarda ardagerlerge arnalǵan «Ardagerim – ardaǵym» taqyrybymen is-sharalar ótkizilip, olarǵa materıaldyq kómek kórsetildi. Sonymen qatar, Ordabasy, Saryaǵash, Maqtaaral aýdandyq sottarynda Uly Otan soǵysynyń jáne tyl ardagerlerimen kezdesýler uıymdastyryldy. Osyndaı aýqymdy is-sharanyń biri Dańq taqtasynyń ashylýy.
Ashylý rásiminiń sońynda N.Sháripov sot júıesiniń ardagerleri A.Beknazarovqa, B.Turǵaraevqa, A.Efstafevaǵa, T.Balkenge, V.Iýzkovqa jáne N.Pavlovaǵa Qazaqstan Respýblıkasy Joǵarǵy Sotynyń «Sot júıesiniń ardageri» medalin tapsyrdy.
Is-shara sońynda ardagerler dastarqanǵa shaqyrylyp, ómirden ozǵan soǵys ardagerlerine Quran baǵyshtaldy.
Q.DÚISENBI,
Ońtústik Qazaqstan oblystyq sotynyń qyzmetkeri.