«Astana Opera» ártisteri Qytaıdan jeńispen oraldy. Teatrdyń jetekshi solısi Dıas Qurmanǵazy men jas horeograf, solıst Sultanbek Ǵumar Lıaonındegi (Shenıan) balet ártisteriniń birinshi halyqaralyq baıqaýynda marapattarǵa ıe boldy, dep habarlaıdy Egemen.kz.
Baıqaý 10 elden kelgen 400-den astam qatysýshyny biriktirdi, al qazylar alqasynyń quramynda álemdik sahnada tanylǵan 20 sheber jumys istedi. Dıas Qurmanǵazy úzdik oryndaý úshin, al Sultanbek Ǵumar úzdik horeografııa úshin júldeger atandy.
Shenıan sahnasynda Dıas Qurmanǵazy óziniń seriktesi Kamıla Shahmanovamen birge P.Chaıkovskııdiń «Jańǵaq shaqqysh», R.Drıgonyń «Talısman» baletterinen úzindilerdi jáne Sultanbek Ǵumardyń qoıylymyndaǵy «Ańsaý» nómirin oryndady. Sońǵy qoıylym baǵdarlamanyń kórkine aınalyp, qazylar alqasy tarapynan ártisterdiń plastıkasy, nómirdegi mýzykasy joǵary baǵalanyp, basqa qatysýshylardyń birsaryndy bılerine uqsamaıtynyn atap ótti. Klassıkalyq nómirler boıynsha ártistermen Qazaqstannyń eńbek sińirgen qaıratkeri Rústem Seıitbekov jumys istedi.
Qoıylymnyń mýzykasyn kórkemdegen «HasSaq» etno-folklorlyq tobynyń kompozısııasy boldy. Horeograftyń aıtýynsha, qoıylymnyń az ýaqyt ishinde paıda bolýyna da osy mýzyka áser etken.
Bul marapattar qazaqstandyq balet mektebiniń halyqaralyq bedeline qosylǵan eleýli úles boldy. «Astana Opera» úshin mundaı baıqaýlar joǵary daıyndyq deńgeıin kórsetýge, álemdik balettiń jetekshi ókilderimen shyǵarmashylyq baılanystyrdy nyǵaıtýǵa jáne Qazaqstandaǵy bıshilerdiń jańa býynyn shabyttandyrýǵa múmkindik beredi.