Oblystyq ishki ister departamentiniń murajaıynda Uly Jeńistiń 70 jyldyǵyna arnalǵan ıgi shara ótti. Oǵan ardagerler keńesiniń músheleri men departament basshylary qatysty. Bul kezdesýdiń maqsaty Uly Otan soǵysynyń jáne ishki ister organdarynyń ardagerlerine qurmet kórsetý bolyp tabylady.
Oblystyq ishki ister departamentiniń bastyǵy, polısııa polkovnıgi Mahsýdhan Ablazımov ardagerlerdi alda kele jatqan Uly Jeńistiń 70 jyldyǵymen jeke quramnyń atynan quttyqtady, olardyń eren erlikteri men adal eńbekteri úshin alǵys sezimin bildirdi. Uly Otan soǵysynyń tórt jáne eńbek maıdanynyń qyryq eki ardagerine Qazaqstan Respýblıkasy Prezıdentiniń Jarlyǵy negizinde «1941-1945 jyldardaǵy Uly Otan soǵysyndaǵy Jeńistiń 70 jyldyǵy» merekelik medalin tapsyrdy. Sondaı-aq, Uly Otan soǵysynyń ardagerlerine 100 myń teńgeden, al tylda eńbek etken ardagerlerge 35 myń teńgeden aqshalaı syılyq usyndy.
Qatary sırep qalǵan soǵys ardagerleri Jumaı Álishev, Nyǵmet Meıirmanov, Mıhaıl Dıdenko, Grıgorıı Prıhno mundaı qurmetke shyn júrekten rıza boldy. Uly Jeńistiń kózi tiri kýágerleri elimizde tynyshtyq pen birlik bolýyn tiledi. Ardagerler ózara áńgime quryp, ótken-ketkendi eske túsirip, bir jasap qaldy. Balalyq shaqtary soǵystyń qıyn jyldarymen tuspa-tus kelgen tyl ardagerleri de urpaqtar sabaqtastyǵynyń altyn arqaýy úzilmeıtinin ańǵartty. Bul kezdesý erliktiń eskirmeıtininiń, eńbektiń umytylmaıtynynyń ádemi kórinisi boldy.
Saltanatty sharanyń sońynda IID ǵımaratynyń aldyndaǵy alańǵa ardagerler óz qoldarymen aǵash kóshetterin otyrǵyzyp, bul alleıany Uly Jeńistiń 70 jyldyǵyna arnap «Jeńis alleıasy» dep atady.
Satybaldy SÁÝIRBAI, «Egemen Qazaqstan».
Aqtóbe oblysy.