«Bilimdi biriktirip, bolashaqty quramyz» taqyrybyndaǵy IFLA Álemdik kitaphana jáne aqparat kongresi alǵash ret Ortalyq Azııada ótti. Kitaphana isindegi eń iri halyqaralyq sharany ótkizý quqyǵy Kazakh Tourism ázirlegen ótinim negizinde, QR Týrızm jáne sport mınıstrligi, Astana Tourism jáne JOO kitaphanalary qaýymdastyǵynyń qoldaýymen berildi, dep habarlaıdy Egemen.kz.
IFLA (International Federation of Library Associations) – kitaphana salasyndaǵy eń iri halyqaralyq uıym, ol ozyq tájirıbeni zerdelep, jahandyq standarttar ázirleıdi jáne kásibı qaýymdastyqtardy damytady.
Kongreske ulttyq kitaphanalardyń basshylary, halyqaralyq uıymdardyń ókilderi, akademııalyq jáne ǵylymı ortadan kelgen mamandardy qosa alǵanda, 114 elden shamamen 1700 delegat qatysty. Eń iri delegasııalar qatarynda AQSh, Qytaı, Koreıa Respýblıkasy, Germanııa boldy. Qatysýshylardyń tórtten bir bóligine jýyǵy Eýropa elderinen keldi.
Týrızm jáne sport mınıstrliginiń baspasóz qyzmetiniń málimdeýinshe, kongress aıasynda álemniń ártúrli elinen 29 kompanııa qatysqan halyqaralyq kórme ótti. Qatysýshylar arasynda ISSN Halyqaralyq ortalyǵy, Amerıkandyq kitaphana qaýymdastyǵy, Korol Abdýlazız atyndaǵy Qoǵamdyq kitaphana, Muhammed bın Rashıd ál-Maktým kitaphanasy qory, sondaı-aq Taylor & Francis, Springer-Verlag syndy jetekshi uıymdar men baspalar bar.
«IFLA alǵash ret Kongresti Ortalyq Azııada ótkizip otyr, bıyl bizde bul sharaǵa alǵash ret kelgen delegattardyń úlesi eń joǵary boldy. Biz bul Kongresti kitaphana-aqparattyq qyzmetterdiń turaqty damýynyń ulttyq strategııasyn ázirleýge, kásibı damýǵa jaǵdaı jasaýǵa jáne otandyq kitaphanalardyń jahandyq kásibı jelige odan ári yqpaldasýyna túrtki bolatyn mańyzdy alań retinde qarastyramyz», dedi IFLA prezıdenti Vıkı Makdonald.
Tórt kún boıy Kongress alańynda kitaphana salasyndaǵy zamanaýı úrdister, sıfrlyq ınnovasııalar jáne turaqty damý máseleleri talqylandy. Baǵdarlamada jasandy ıntellekt, úlken derekter, sıfrlyq kitaphanalar, ınklıýzııa jáne qorlardy saqtaý taqyryptaryna arnalǵan 86 sessııa men 15 qosymsha is-shara ótti. Kongress kitaphana jáne baspa isindegi ınnovasııalyq sheshimderdi usynyp qana qoımaı, aqparat pen bilim salasyndaǵy halyqaralyq yntymaqtastyqty da nyǵaıtty.