Astanada Konstıtýsııa kúni qarsańynda ótken 2022 jylǵy konstıtýsııalyq túzetýlerge túsindirmeniń 2-basylymynyń tusaýkeseri barysynda Konstıtýsııalyq Sot ókilderi Konstıtýsııaǵa engizilgen ózgerister nátıjesinde qaıta qurylǵan jańa quqyqtyq ınstıtýttyń jumysy týraly baıandady, dep jazady Egemen.kz.
Konstıtýsııalyq Sot óz jumysyn 2023 jylǵy 1 qańtarda bastady. Konstıtýsııalyq Sottyń sýdıasy Erkin Ońǵarbaevtyń aıtýynsha, Konstıtýsııalyq Sottyń burynǵy Konstıtýsııalyq Keńesten basty aıyrmashylyǵy – azamattardyń tikeleı júginý quqyǵynyń paıda bolýy.
«Buryn mundaı quqyq bolmaǵan. 2023 jylǵy 1 qańtardan osy kúnge deıin Konstıtýsııalyq sotqa kelip túsken ótinishterdi qarasaq, azamattardan 11 myńnan astam ótinish kelip túsken. Basqa memlekettik organdardyń, Prezıdenttiń, Parlament depýtattarynyń ótinishteri bar. Alaıda, 99%-y – azamattardyń tikeleı ótinishteri. Árıne, bul — demokratııalyq memlekettiń damýy jolyndaǵy úlken serpilis. Prezıdentimiz jıi aıtatyn Ádiletti Qazaqstan ıdeıasy – osy Konstıtýsııalyq Sottyń qyzmeti arqyly da iske asyp jatyr», dedi Erkin Ońǵarbaev.
Onyń aıtýynsha, Konstıtýsııalyq Sottyń qurylýy memlekettik organdardy tártipke keltirip, zań shyǵarý prosesine, sonyń ishinde Parlament pen Úkimet jumysyna áser etedi.
«Konstıtýsııalyq Sot óz jumysyn bastaǵaly beri 74 normatıvtik qaýly qabyldady, olardyń basym bóligi – azamattardyń konstıtýsııalyq quqyqtaryn qorǵaýǵa baǵyttalǵan», dep naqtylady Konstıtýsııalyq Sot sýdıasy.
Konstıtýsııalyq Sot óz jumysynda halyqaralyq quqyq qaǵıdattaryna súıenedi jáne Quqyq arqyly demokratııa úshin Eýropalyq Komıssııasymen (Venesııa Komıssııasy) tyǵyz yntymaqtastyq ornatqan.
«1948 jyly BUU Adam quqyqtarynyń jalpyǵa birdeı deklarasııasyn qabyldady. Eger Konstıtýsııamyzǵa qaraıtyn bolsaq, onda osy adam men azamattyń negizgi quqyqtary men bostandyqtarynyń barlyǵy derlik bizdiń zańnamamyzda kórinis tapqan. Bizdiń basty rólimiz – adam quqyqtaryn, olardyń bólinbeıtin jáne absolıýtti sıpatyn Konstıtýsııalyq Sot arqyly qorǵaý», dedi Erkin Ońǵarbaev.