Qytaı astanasynda ShYU-nyń gýmanıtarlyq almasý-2025 boıynsha «Úılesimdilik pen birlik: bolashaqty birge jasaımyz» forýmy ótti. Forým jumysyna Qazaqstan Prezıdenti Teleradıokesheni delegasııasy qatysty, dep jazady Egemen.kz.
Is-sharada BAQ-tyń Shanhaı Yntymaqtastyq Uıymynyń gýmanıtarlyq kún tártibin ilgeriletýdegi, elder arasyndaǵy uzaq merzimdi áriptestik pen ózara túsinistikti nyǵaıtýdaǵy róli talqylandy. Jasandy ıntellekt, úlken derekter jáne zamanaýı kommýnıkasııalardy ózgertetin mýltımedııalyq formattardy qosa alǵanda, jańa tehnologııalarǵa erekshe nazar aýdaryldy.
Forýmda «Silk Way Star» halyqaralyq mýzykalyq shoýynyń ashylý saltanaty ótti. Esterińizge sala keteıik, bul Qazaqstan Prezıdenti TRK men Qytaı CMG medıa korporasııasynyń birlesken jobasy.
Medıa forým jumysyna qatysqan QKP OK nasıhattaý bóliminiń meńgerýshisi Lı Shýleı shaǵyn quramdaǵy kezdesýde «Silk Way Star» jobasynyń aýqymy Qazaqstan men Qytaıdyń mádenı-gýmanıtarlyq yntymaqtastyǵynyń strategııalyq deńgeıin kórsetetinin atap ótti. Sondaı-aq jobaǵa sáttilik tiledi.
– «Silk Way Star» mádenı birliktiń jańa platformasyna aınaldy. Bul – talanttardy, elder men halyqtardy biriktiretin, senim men shabyt kópirin quratyn joba, dep atap ótti QR Prezıdenti Teleradıokesheniniń dırektory Raýshan Qajybaeva.
CMG basshysy Shen Haısıýn R.Qajybaevamen kezdesýde mýzykalyq shoýdyń birinshi maýsymy Qytaıdyń CCTV-3 otbasylyq oıyn-saýyq telearnasynda kórsetiletinin atap ótti. Sondaı-aq ekinshi maýsymdy Qytaıda túsirý nıetin rastady.
Medıa forýmnyń qorytyndysyn talqylaı otyryp, qatysýshylar ShYU Sammıti qarsańynda onyń mańyzyn atap ótip, uıymǵa qatysýshy elderdiń mádenı-gýmanıtarlyq yntymaqtastyǵyn odan ári keńeıtý úshin «Silk Way Star» jobasynyń rólin atap ótti.
Esterińizge sala keteıik, «Silk Way Star» jobasyna 12 el – Ázerbaıjan, Armenııa, Grýzııa, Úndistan, Qazaqstan, Qytaı, Qyrǵyzstan, Mońǵolııa, Tájikstan Túrikmenstan, О́zbekstan jáne Ońtústik Koreıa ókilderi qatysyp jatyr.
Mýzykalyq shoýdyń túsirilimi 2025 jyldyń 26 tamyzynda bastalady. Úlken fınal 22 qarashada «Jibek Joly/ Silk Way» telearnasynyń tikeleı efırinde jáne qatysýshy elderdiń jetekshi telearnalarynda ótedi.
«Silk Way Star» – jaı ǵana mýzykalyq joba emes, mıllıondaǵan kórermenderdi biriktiretin jáne óńirdiń biryńǵaı medıa keńistigin quratyn Eýrazııanyń jańa mádenı brendi.
Aıta keteıik, halyqaralyq «Silk Way Star» baıqaýynyń 12 qatysýshysy túgel Astanaǵa keldi.
Elimizdiń atynan baıqaýda ánshi Alem óner kórsetetin boldy.