Prezıdent Qasym-Jomart Toqaev Tájikstan Madjlısı Olı Madjlısı mıllı tóraǵasy Rýstamı Emomalıdi qabyldap, qazaq-tájik strategııalyq seriktestigi jáne odaqtastyq qatynastaryn parlamentaralyq baılanystardy damytý máselesin talqylady, dep habarlaıdy Egemen.kz Aqordanyń baspasóz qyzmetine silteme jasap.
Memleket basshysy ekijaqty yntymaqtastyqtyń damý qarqynyna joǵary baǵa berdi. Sondaı-aq Rýstamı Emomalıdiń sapary Qazaqstan men Tájikstannyń ózara yqpaldastyǵyn odan ári nyǵaıtýda mańyzdy ekenine toqtaldy.
Tájikstan Parlamenti joǵary palatasynyń spıkeri qonaqjaılyq tanytqany úshin Memleket basshysyna alǵys aıtyp, Tájikstan Prezıdenti Emomalı Rahmonnyń sálemin jetkizdi.
Rýstamı Emomalı Qazaqstan Tájikstannyń senimdi strategııalyq seriktesi jáne odaqtasy ekenin atap ótti. Sonymen qatar Memleket basshysyn Qazaqstan Respýblıkasy Konstıtýsııasynyń 30 jyldyǵymen quttyqtap, halyqtarymyzdyń ıgiligi úshin eki eldiń parlamentteri arasynda konstrýktıvti jáne iskerlik baılanystar jolǵa qoıylǵanyna nazar aýdardy.
Kezdesýde saýda-ekonomıkalyq yqpaldastyqtyń, parlamentaralyq dıplomatııa men sý salasyndaǵy baılanysty arttyrýdyń ózekti máseleleri talqylandy. Sonymen qatar ekijaqty qarym-qatynas dostyq jáne ózara qoldaý rýhynda damyp kele jatqany aıtyldy.
Memleket basshysy ekijaqty strategııalyq seriktestikti nyǵaıtýǵa ólsheýsiz úles qosqany úshin Rýstamı Emomalıdi II dárejeli «Dostyq» ordenimen marapattady.