Y. Altynsarın atyndaǵy Ulttyq bilim akademııasy jańa 2025–2026 oqý jylynyń bastalýyna oraı dástúrli Ádistemelik-nusqaý hatty pedagogterge, ádiskerlerge jáne mektep basshylaryna usyndy, dep jazady Egemen.kz.
Akademııa prezıdenti Názıpa Aıýbaevanyń málimdeýinshe, bıylǵy qujattyń basty maqsaty – bilim sapasyn kóterýmen qatar, tárbıe men qundylyqtardy sabaqtastyrý, sıfrlyq dáýir talaptaryna saı daǵdylardy damytý jáne ár balanyń ereksheligin eskere otyryp qoldaý kórsetý.
«Adal azamat» baǵdarlamasy barlyq pán mazmunyna kiriktirilip, oqýshylardyń boıyna adaldyq, jaýapkershilik, eńbeksúıgishtik sııaqty qasıetterdi darytýǵa baǵyttalady.
Sonymen qatar, mańyzdy baǵyttardyń biri – Jasandy ıntellektini sabaq barysynda qoldaný. Bul muǵalimderge oqýshylardyń jeke deńgeıine saı tapsyrma usynýǵa, oqý materıalyn túrlendirip túsindirýge, oqý traektorııasyn qurýǵa múmkindik beredi.
Barlyq pánderde fýnksıonaldyq saýattylyqty arttyrýǵa erekshe nazar aýdarylýda. Mysaly: • Matematıkada – logıkalyq oılaý, • Jaratylystanýda – tájirıbelik zertteý, • Tilderde – medıasaýattylyq, • Tarıhta – synı oılaý daǵdylary kúsheıtiledi.
Bul baǵyttar oqýshylardy ómirde naqty qoldana alatyn bilimmen qamtamasyz etýge arnalǵan.
Zertteý men jobalyq jumystar oqýshylardyń shyǵarmashylyǵyn, derbestigin jáne toppen jumys isteý qabiletterin damytýǵa yqpal etedi.
Jańa oqý jylynyń negizgi erekshelikteri: • 1-synyptarda oqý jyly – 33 apta, 2–11(12)-synyptarda – 34 apta; • «Keleshek mektebi» jáne «Aýyl mektebi – sapa alańy» jobalary jalǵasady; • «Jumysshy mamandyqtar jyly» aıasynda beıindik synyptar ashylady; • Ár mektepte proforıentator-pedagog jumys istep, balalarǵa erte kásiptik baǵdar berýge kómektesedi; • Pedagogterdi attestattaýdyń jańa erejeleri qoldanysqa engiziledi.
Akademııa prezıdenti Názıpa Aıýbaeva pedagogterdi jańa oqý jylyndaǵy mańyzdy baǵyttarmen Tamyz konferensııasynda jáne óńirlik pedkeńesterde tanystyrǵanyn atap ótti.
«Ádistemelik-nusqaý hat – ustazdarǵa jol kórsetetin senimdi qural bolady dep senemiz. Jańa oqý jyly bilim berý sapasyn arttyryp, jas urpaqtyń bolashaǵyna senimdi baǵdar berýge jol ashady», – dedi Názıpa Aıýbaeva.