О́ziniń aýqymdylyǵy men ásemdigi jóninen parad mıllıondaǵan qazaqstandyq úshin biregeı jáne este qalarlyq oqıǵa boldy. Barlyq ásker tekteriniń ókilderi «Qazaq Eli» monýmenti aldynan jaıaý, kólikpen júrip ótse, tikushaqtarmen jáne ushaqtarmen ushyp ótti. Elimiz Qarýly Kúshteriniń jeke quramy men áskerı tehnıkalarynyń rekordtyq sany, tipti, kópti kórgen kórermenderdi de tań-tamasha qaldyrdy. Paradqa shamamen 5 myń áskerı qyzmetshi, 200-deı qarý-jaraq birligi men áskerı tehnıka, áskerı avıasııanyń 70 tikushaǵy men ushaǵy qatysty.
Parad-2015-tiń vızıtti kártishkesi tek aýqymdylyǵy ǵana emes, sondaı-aq, sabaqtastyǵy boldy. Tý ustaýshylardyń Otanymyzdyń Memlekettik týy men Jeńistiń Qyzyl týyn – 70 jyl buryn bizdiń otandasymyz R.Qoshqarbaev pen onyń jaýyngerlik serigi G.Býlatov Reıhstagta jelbiretken týdyń dál kóshirmesin alyp shyǵýy júrek tolqytatyn sátke aınaldy. Jeńistiń nyshanyna aınalǵan Jaýyngerlik tý Qazaqstanǵa Máskeýdegi Taǵzym taýynan jetkizilgen bolatyn.
Jaıaý kolonnalar men áskerı tehnıkaǵa masattanbaı qaraý múmkin emes edi. Orasan zor ásem kórinisterde avıa-dýman erekshe oryn aldy. Astana ústinen maıdandyq, áskerı-kóliktik jáne armııalyq avıasııanyń toptary ushyp ótti. Áskerı ushqyshtar jeke jáne ushý toptary quramynda ushýdyń nebir aıshyqty órnekterin oryndap, Uly Jeńis mereıtoıyn bildiretin «70» sanyn kórsetti.