Elimizde zeınetaqy men járdemaqy tóleý tártibi qatańdamaq. Eńbek jáne halyqty áleýmettik qorǵaý mınıstrligi Zeınetaqy jáne áleýmettik kodekske ózgerister engizý týraly túzetýler paketin ázirledi. Jańa erejeler Qazaqstanda turaqty tirkeýi joq azamattarǵa tikeleı áser etedi, dep jazady Egemen.kz.
Monıtorıng nátıjesinde, elde 108 myńnan astam adamnyń turaqty tirkeýi joq, al taǵy 28 myńnan astamy tek ýaqytsha tirkelgeni anyqtalǵan. Eger túzetýler qabyldansa, mundaı azamattardyń zeınetaqysy men járdemaqysy ýaqytsha toqtatylady.
Qujatta bul ózgeristerge qatysty narazylyq bolýy múmkin ekeni de atap ótilgen:
«Osy normalardy qabyldaý elden tys jerlerge ketken jáne osy elde turýǵa yqtııarhat alǵan zeınetaqy men járdemaqy alýshylar (Qazaqstan azamattary) tarapynan narazylyqqa ákep soǵýy múmkin. Mundaı jaǵdaıda tólemder mán-jaıdy anyqtaǵanǵa deıin toqtatyla turady», delingen túsindirmede.
Budan bólek, tolyq memlekettik qamsyzdandyrýda júrgen áleýmettik qyzmet kórsetý ortalyqtaryndaǵy jáne qylmystyq-atqarý júıesi mekemelerinde turatyn azamattarǵa zeınetaqy tólemderi toqtatylady.
Túzetýler ataýly áleýmettik kómek júıesine de áser etedi. Endi ony taǵaıyndaý kezinde otbasynyń tabysymen qatar, shyǵystary, nesıeleri, depozıtteri jáne múlki de eskeriletin bolady. Mınıstrliktiń aıtýynsha, bul shara tólemderdiń naqtylyǵyn arttyryp, bıýdjet qarajatyn negizsiz jumsaýdy azaıtýǵa baǵyttalǵan.
Sonymen qatar qujatta dekrettik tólemderdiń eń joǵarǵy mólsherin shekteý qarastyrylǵan. Jańa ereje boıynsha, bul soma 7 eń tómengi jalaqydan aspaıdy, al jumyssyzdyq boıynsha járdemaqy taǵaıyndaýǵa baqylaý kúsheıedi.
Eńbek mınıstrligi bul sharalar áleýmettik saqtandyrý júıesiniń qarjylyq turaqtylyǵyn keminde 2032 jylǵa deıin qamtamasyz etýge baǵyttalǵanyn málimdedi.
Zań jobasyn 2025 jyldyń jeltoqsan aıynda qabyldaý josparlanyp otyr.