Prezıdent Qasym-Jomart Toqaev zańsyz aktıvterdi qaıtarý jónindegi komıtetti ınvestorlardyń quqyqtaryn qorǵaý komıteti dep qaıta ataýdy usyndy. Bul týraly Memleket basshysy búgingi Joldaýynda aıtty, dep jazady Egemen.kz.
Memleket basshysynyń aıtýynsha, qazirgi kúrdeli ahýalda elge ınvestısııa tartý – kezek kúttirmeıtin másele.
«Bizge jańa ustanym kerek. Qalaı bolsa da, ınvestısııa tartý boıynsha barlyq úılestirý jumysy tikeleı Premer-mınıstrge júkteledi», dedi Qasym-Jomart Toqaev.
Prezıdent elimizdegi mekemelerdiń birde-biriniń ataýynda «ınvestısııa» degen sózdiń joqtyǵyna nazar aýdardy.
«Investısııa jetim bala sııaqty úsh-tórt mekemege ortaq másele bolyp, óz ornyn tappaı otyr. Sondyqtan Oljas Bektenov 10 kún ishinde naqty usynys aıtýy qajet», dep tapsyrdy Prezıdent.
Sonymen qatar, Úkimetke ınvestısııa tartý júıesin túgel jańǵyrtý jónindegi naqty jospardy qysqa merzim ishinde ázirleý mindetteldi.