Memlekettik keńesshi Erlan Qarın bıylǵy Joldaýǵa qatysty pikir bildirdi. Onyń aıtýynsha, Prezıdent Qasym-Jomart Toqaevtyń Joldaýynyń basty ári biriktirýshi ıdeıasy – sıfrlandyrýdy keń kólemde damytý jáne jasandy ıntellektini jappaı engizý, dep habarlaıdy Egemen.kz.
«Prezıdent Qasym-Jomart Toqaev ekonomıkanyń túrli salalaryna sıfrlandyrý men jasandy ıntellekt quraldaryn jedeldetip engizý mindetin júktedi. Bul qadamnyń barlyǵy jınaqtala kelip, Qazaqstannyń jańa Ulttyq sıfrlyq damý strategııasyna biriktiriledi. Qazaqstan jańa tehnologııalardy damytý men engizýde keshendi ári júıeli sheshimder qabyldaǵan álemdegi alǵashqy elderdiń biri bolyp otyr. Bul rette Qazaqstan bolashaqta tehnologııalyq turǵydan damyǵan memleket atanýdy kózdeıdi. Osylaısha, bıylǵy Joldaýda sıfrlyq transformasııa men jasandy ıntellektini engizý bizdiń el úshin jańa ulttyq ıdeıa retinde aıqyndaldy», dedi Erlan Qarın.
Sondaı-aq Erlan Qarın Memleket basshysynyń jańa saıası bastamalaryna toqtaldy.
«Usynylǵan parlamenttik reforma prezıdenttik saıasattaǵy «Kúshti Prezıdent – Yqpaldy Parlament – Esep beretin Úkimet» formýlasyn damytady. Referendým ótkizý jónindegi usynys Memleket basshysynyń el bolashaǵyn aıqyndaıtyn túıindi máselelerge qatysty tek halyqpen keńese otyryp sheshim qabyldaý qaǵıdatyn berik ustanatynyn kórsetti. Prezıdent buǵan deıin de 2022-2023 jyldardaǵy reformalardy, sondaı-aq AES salý jónindegi referendýmdy aldyn ala jarııalap, ashyqtyqty qamtamasyz etken edi. Bul joly da áńgime Konstıtýsııaǵa jedel ózgerister engizý nemese Parlament saılaýyn ótkizý týraly emes. Basty maqsat – saıası júıeniń ınstıtýsıonaldyq negizderin odan ári nyǵaıtý», dedi ol.
Memlekettik keńesshiniń pikirinshe, Prezıdent oılastyrylǵan ári birizdilikke negizdelgen dáıekti tásildi quptaıdy.
«Aldymen sarapshylar men qoǵam arasynda jan-jaqty ári tereń talqylaý júrgizilýi tıis. Osylaısha, Qazaqstan kezeń-kezeńimen jáne jan-jaqty júzege asyrylatyn saıası jańǵyrýdyń úlgisin taǵy da kórsetti», dedi Memlekettik keńesshi.