Jer sharyndaǵy eń bıik taý – Everestte qoqys máselesin sheshýdiń jańa joly qolǵa alyndy. Nepal bıligi alǵashqy ret júk tasymaldaýshy DJI FlyCart 30 drondaryn iske qosyp, 2025 jyldyń sáýir-maýsym aılary aralyǵynda 6065 metr bıiktikte ornalasqan lagerden 300 keliden astam qaldyqty tómenge jetkizdi, dep habarlaıdy Egemen.kz Popular science agenttigine silteme jasap.
Aıta keteıik, jylyna shamamen 600 adam shyńǵa shyǵýǵa talpynyp, ár alpınıst orta eseppen 8 keli qoqys qaldyrady. Ol ottegi ballondary, gaz ballonshalary, taǵam qaldyqtary men bıologııalyq qoqystar. Buǵan deıin barlyǵy qolmen jınalsa, endi jańa tehnologııa qaldyqtardyń 70%-yn shyǵarýǵa múmkindik berip otyr.
DJI FlyCart 30 bir reıste 15 kelige deıin júk tasymaldaıdy. Baǵasy 20 myń dollarǵa deıin jetetin qurylǵy -15,5 °C sýyqqa tótep berip, sekýndyna 40 km-ge deıin jetetin qatty jelde de jumys isteı alady. Budan bólek, dál osy drondar Ama-Dablam taýynda qoldanysqa engizilip, 641 keli qoqys tómenge túsirildi.
2019 jyldan bastap Nepal bıligi alpınısterden 4 myń dollar kóleminde kepildik talap ete bastady. Eger alpınıst kem degende 8 keli qoqysty birge alyp tússe, aqsha qaıtarylady. Ekspedısııa sanyn azaıtý máselesi qarastyrylyp jatqanymen, týrızmnen túsetin kiris el ekonomıkasy úshin mańyzdy bolǵandyqtan, ázirge shekteý engizilgen joq.
Airlift Ventures kompanııasy kelesi kezeńde Manaslý taýynda da drondardy synaýdy kózdep otyr. Alaıda ol jaqtaǵy qatty jel jumysty qıyndatyp tur.