Májiliste Depýtat Sergeı Ponomarev Almatydaǵy qurylys máseleleri boıynsha QR Premer-mınıstrimen Almaty qalasynyń ákiminiń atyna depýtattyq saýal joldady. Onda halyq qalaýlysy qaladaǵy arhıtektýralyq tutastyqty saqtaýǵa baǵyttalǵan Prezıdent Qasym-Jomart Toqaevtyń tapsyrmalary júıeli túrde oryndalmaı otyrǵanyn aıtty, dep habarlaıdy Egemen.kz.
«Prezıdentimiz Joldaýda qurylys salasyn qatań baqylaýǵa alý úshin arnaıy Kodeks qabyldaýdy tapsyrǵan edi. Buǵan deıin Almatyda jáne onyń taýly aımaqtarynda núktelik qurylysqa tyıym salynǵan bolatyn. Biraq, ókinishke qaraı, bul sheshimder áli kúnge deıin oryndalmaı keledi», dedi depýtat.
Ol Almaty turǵyndarynan eń kóp shaǵym túsetin RAMS qurylys kompanııasynyń qyzmetine jeke toqtaldy. Atalǵan kompanııa eldegi eń iri segizinshi qurylys kompanııasy sanalǵanymen, onyń turǵyn úı keshenderi halyqtyń qatań synyna ushyrap otyr.
«Meniń telefonym turǵyndardyń RAMS kompanııasyna qatysty shaǵymdarynan tynym tappaıdy. Bul kompanııa burynǵy jobalaryn durys aıaqtamaı jatyp, jańa alyp nysandarǵa kirisedi. Olardyń ýádeleri oryndalmaıdy, al salynǵan úılerde jaryq pen sý únemi úzilip qalady, jertólelerin kógerip, shatyrlary aǵyp tur, parkıng jetispegendikten kóshelerde kólik keptelisi kúsheıgen. Tipti ýáde etilgen mektep qala balansyna berilmeı, jekemenshikke aınalyp, qarapaıym turǵyndar úshin qoljetimsiz bolyp otyr», dedi depýtat Ponomarev.
Onyń aıtýynsha, RAMS kompanııasynyń «Sakýra», «Nef uptown» sekildi basqa da turǵyn úı keshenderi de dál osyndaı máselelerge toly. Soǵan qaramastan, kompanııa qazir «Beyond» dep atalatyn 40 qabatty záýlim munara salýǵa kirisken. Bul joba qoǵamda úlken narazylyq týǵyzǵan.
«Depýtattardyń aralasýymen atalǵan qurylys ýaqytsha toqtatylyp, zańdylyǵy tekserilip jatyr. Biz Almatynyń arhıtektýralyq beınesin qorǵap qalýymyz kerek», dedi Ponomarev.
Sergeı Ponomarev sondaı-aq Prezıdent usynǵan jańa baǵyt Alataý-sıtı jobasyna nazar aýdardy.
«Alataý – bolashaqtyń qalasy. Bul ınnovasııa men tehnologııa toǵysqan ortalyq Almatyny aıtarlyqtaı jeńildetýi tıis», dedi ol.
Sózin qorytyndylaı kele depýtattyń sońǵy bes jylda RAMS kompanııasy salǵan nysandardyń barlyq ruqsat qujattary men sapasyn tekserýdi usyndy.
Sonymen qatar jobalyq-smetalyq qujattamasyz, ekspertızasyz bastalǵan 40 qabatty «Beyond» munarasyn salýǵa tyıym salyp, onyń ornyna saıabaq nemese áleýmettik nysan turǵyzý múmkindigin qarastyrýdy atap ótti.