Qazaqstannyń eki oblysynda otbasylardyń ál-aýqat deńgeıin baldyq úlgi arqyly baǵalaý negizinde memlekettik qyzmetterdi kórsetýge arnalǵan pılottyq joba iske qosylady. Joba Eńbek jáne halyqty áleýmettik qorǵaý mınıstrliginiń Biryńǵaı sıfrlyq platformasy arqyly júzege asyrylady, dep habarlaıdy Egemen.kz.
Eńbek jáne halyqty áleýmettiń qorǵaý mınıstrliginiń habarlaýynsha, jańa ádis respýblıkalyq bıýdjetten áleýmettik tólemderdiń barlyq túrin saqtaı otyryp, jergilikti bılik tarapynan qosymsha qoldaýdy tek shynymen muqtaj jandarǵa baǵyttaýǵa múmkindik beredi.
2020 jylǵy 22 mamyrda pılottyq jobany Shymkent qalasy men Qaraǵandy oblysynda iske asyrý týraly alty memlekettik organnyń birlesken buıryǵyna qol qoıylǵan.
«Otbasynyń ál-aýqat deńgeıi 23 áleýmettik-demografııalyq jáne ekonomıkalyq krıterııler boıynsha anyqtalatyn bolady. Qosymsha qoldaý sharalaryna ótinish bildirgen barlyq otbasylar 6 sanatqa jikteledi – asa qajettilikten (azyq-túlikke qarajattyń bolmaýy) joǵary ál-aýqatqa deıin (qarjylyq qıyndyqtar joq). Sheshim otbasynyń sıfrlyq kartasy arqyly jınalǵan obektıvti derekter negizinde avtomatty túrde qabyldanady», delingen habarlamada.
Atalǵan kómek barlyǵyna birdeı emes, qajettiligine qaraı kórsetiledi.
«Azamattardyń ál-aýqat deńgeıin baǵalaý kezinde kelesi kórsetkishter eskeriledi: tabys kólemi, jyljymaıtyn múlik pen kólik quraldarynyń bolýy, nesıe júktemesi, sondaı-aq materıaldyq emes faktorlar — densaýlyq jaǵdaıy, múgedektik, bilim deńgeıi jáne otbasynyń asyraýyndaǵy adamdar sany. Sonymen qatar, jasyryn tabys kózderi, mysaly, beıresmı jumyspen qamtylý faktileri de nazarǵa alynady.
Eger úı sharýashylyǵynda 2 nemese odan da kóp turǵyn úı, 2 jáne odan da kóp kólik, tirkelgen kásipkerlik sýbektisi (JK nemese JShS) bar bolsa jáne bir adamǵa shaqqandaǵy tabys eń tómengi kúnkóris deńgeıiniń 4 eselengen mólsherinen assa, onda mundaı otbasy 6-sanatqa – joǵary ál-aýqatty dep tanylyp, jergilikti bıýdjetten qosymsha áleýmettik qoldaýdan alynyp tastalady.
Al 1-den 5-sanatqa deıingi otbasylar úshin áleýmettik kómek sharalary avtomatty túrde taǵaıyndalady.
Aıta ketý kerek, bul skorıngtik model respýblıkalyq bıýdjetten bólinetin 41 túrli kepildendirilgen áleýmettik tólemge áser etpeıdi. Iаǵnı bazalyq jáne yntymaqty zeınetaqy, júktilik pen bala kútimi boıynsha, kópbalaly analarǵa jáne múgedektigi bar azamattarǵa beriletin járdemaqylar burynǵydaı saqtalady», delingen habarlamada.
Aıta keteıik, baldyq úlginiń engizilýi respýblıkalyq bıýdjetten tólenetin barlyq kepildendirilgen áleýmettik tólemderge áser etpeıdi. Zeınetaqy, járdemaqy jáne mindetti áleýmettik saqtandyrý tólemderi burynǵy kóleminde saqtalady.
Bul tásil naqty muqtaj azamattarǵa maqsatty qoldaý kórsetýdi qamtamasyz etýge baǵyttalǵan.