Qazaqstan Respýblıkasynyń Premer-Mınıstri Oljas Bektenov LuLu Group International kompanııasynyń negizin qalaýshy Iýsýf Alı Mýsalıam Vıttıl Abdýl Kadermen kezdesti. Kezdesýde agroónerkásip kesheninde jáne saýda salasynda birlesken ınvestısııalyq jobalardy júzege asyrý máseleleri qaraldy, dep habarlaıdy Egemen.kz.
Iýsýf Alı qazirgi tańda kompanııa Qazaqstannan et jáne aýyl sharýashylyǵy ónimderin jetkizip otyrǵanyn aıtyp, seriktestikti odan ári damytýǵa qyzyǵýshylyq bildirdi. Sondaı-aq ol elimizdegi qolaıly ınvestısııalyq klımat pen zor áleýetti erekshe atap ótti.
Taraptar Qazaqstan aýmaǵynda et óńdeý zaýytyn jáne aýyl sharýashylyǵy ónimderin satyp alýǵa arnalǵan úlestirý ortalyǵyn salý josparyna toqtaldy.
О́z kezeginde Oljas Bektenov Úkimettiń bul bastamalardy qoldaýǵa daıyn ekenin jetkizdi. Onyń aıtýynsha, atalǵan jobalar Memleket basshysy Qasym-Jomart Toqaevtyń Joldaýynda aıtylǵan aýyl sharýashylyǵy ónimderin tereń óńdeý jónindegi tapsyrmalarmen úılesedi.
Aıta keteıik, búginde qazaqstandyq aýyl sharýashylyǵy taýarlary álemniń 70-ten astam memleketine eksporttalady. Aldaǵy ýaqytta salanyń ónimdiligin úsh esege arttyrý esebinen eksport kólemin eki esege ulǵaıtý josparlanǵan.
«Agroónerkásip kesheni elimizdiń ekonomıkasynda qashanda mańyzdy orynda. Qazaqstan birlesken agrotehnoparkter men eksportqa baǵyttalǵan logıstıkalyq habtar qurýdan bastap, elektrondy kommersııany jáne basqa da jobalardy damytýǵa deıingi yntymaqtastyqty keńeıtýge daıyn. Ol úshin elimizde barlyq qajetti jaǵdaılar jasalǵan», dedi Oljas Bektenov.
Kezdesý sońynda memlekettik organdarǵa usynylǵan jobalardy iske asyrýǵa jan-jaqty qoldaý kórsetý tapsyryldy.