Shymkent qalasynda Tótenshe jaǵdaılar mınıstrliginiń qutqarýshylary atpen birge 5 metrlik shuńqyrǵa qulap ketken jasóspirimdi qutqardy, dep jazady Egemen.kz.
Oqıǵa búgin Abaı aýdany Altyntóbe turǵyn alabynda boldy. 2012 jyly týǵan jasóspirim atpen serýendep júrip, abaısyzda shuńqyrǵa qulaǵan.
Qutqarýshylar jedel jetip, alpınıstik quraldardyń kómegimen balany joǵaryǵa shyǵaryp aldy. Jasóspirim tekserý úshin medısına qyzmetkerlerine tapsyryldy.
Al jylqy jergilikti atqarýshy organdarmen birlesip, avtokrannyń kómegimen shyǵarylyp, ıesine qaıtaryldy.
Qyzmetterdiń úılesimdi jumysy men jedel áreketiniń arqasynda oqıǵa sátti aıaqtaldy.