Almaty oblysynda aýyl sportynyń eń iri dodalarynyń biri – «Aq bıdaı – 2025» respýblıkalyq oıyndary bastaldy, dep jazady Egemen.kz.
Saltanatty ashylý rásimine elimizdiń túkpir-túkpirinen kelgen sportshylar, bapkerler jáne sport súıer qaýym jınaldy. Bıylǵy oıyndar on kúnge sozylyp, aýyldyq jerlerden shyqqan daryndy sportshylarǵa óz múmkindikterin kórsetýge jol ashady.
Uıymdastyrýshylardyń aıtýynsha, «Aq bıdaı» týrnıriniń basty maqsaty – aýyl jastary arasynan úzdikterdi iriktep, olardyń kásibı sportqa jol tabýyna yqpal etý. Jarys baǵdarlamasyna 20 sport túri engizilgen.
Almaty oblysy ákiminiń birinshi orynbasary Nurlan Ábdirahym da qatysýshylarǵa sáttilik tilep, aýyl sportynyń el bolashaǵy úshin mańyzyn atap ótti.
«Barshańyzdy respýblıkalyq VIII «Aq bıdaı – 2025» aýyl sport oıyndarynyń ashylýymen quttyqtaımyn! «Aq bıdaı» – aýyl sportynyń damýyna serpin beretin, salaýatty ómir saltyn qalyptastyrýǵa jol ashatyn erekshe múmkindik. Bıylǵy jarysqa elimizdiń barlyq óńirinen 18 jastan asqan úsh myńǵa jýyq aýyl sportshysy qatysyp otyr. Bul doda tek sporttyq sheberlikti shyńdap qana qoımaı, yntymaq pen dostyqty nyǵaıtýǵa qyzmet etedi», – dedi ol.
Sonymen qatar ol Memleket basshysynyń buqaralyq sportty damytýǵa qatysty tapsyrmalaryn atap ótip, Almaty oblysynda júıeli jumystar atqarylyp jatqanyn jetkizdi. О́ńirde 25 myńnan astam sportshy 67 sport túrimen aınalysady. Tek bıyldyń ózinde jergilikti sportshylar halyqaralyq jáne respýblıkalyq jarystarda 1336 medal jeńip alǵan.
Aıta keteıik, «Aq bıdaı – 2025» oıyndary óńirler arasyndaǵy sporttyq yntymaqtastyqty nyǵaıtyp, aýyl jastarynyń salaýatty ómir saltyn ustanýyna yqpal etpek.
Almaty oblysy.