Búgin elordada Álemdik jáne dástúrli dinder lıderleriniń VIII sezi ótip jatyr. Jıynda Memleket basshysy Qasym-Jomart Toqaev buǵan deıin Sezd aıasynda kótergen «Beıbitshilik qozǵalysy» atty ıdeıasyn talqylaýdy usyndy, dep habarlaıdy Egemen.kz.
Memleket basshysynyń aıtýynsha, órkenıetter baılanysyn damytýda, sondaı-aq adamdar men qoǵam arasyndaǵy senimdi nyǵaıtýda aıryqsha ról atqaratyn dinbasylaryna zor úmit artylady.
«Dinı qaıratkerler saıasatkerlerdi parasattylyqqa, izgilikke jáne moraldyq jaýapkershilikke úndep, álemniń qurdymǵa ketýine jol bermeý úshin qoldan kelgenniń bárin jasaıtynyna senimdimin. Dúnıe júzinde mundaı úlgi tutar talpynystar joq emes. Álemdik jáne dástúrli dinder kóshbasshylarynyń sezi, Adamzat baýyrlastyǵy týraly qujat, Mekke deklarasııasy, Bahreın forýmy, Birikken Arab Ámirlikterindegi «Ibrahım záýzatynyń úıi» – osy bastamalardyń barlyǵy tize qosyp áreket etse, din uıystyrýshy kúshke aınalatynyn kórsetedi. Mundaı tájirıbeni odan ári damytyp, keńinen taratý qajet», dedi Qasym-Jomart Toqaev.Budan ári Prezıdent Qazaqstannyń dinaralyq jáne mádenıetaralyq dıalogty nyǵaıtýǵa qatysty ustanymymen bólisti. Halyqaralyq jáne óńirlik uıymdar deńgeıinde dinı dıplomatııanyń áleýetin paıdalaný mańyzdy ekenin aıtty.
«Osyǵan deıingi Sezd aıasynda kótergen «Beıbitshilik qozǵalysy» atty ıdeıamdy talqylaýdy usynamyn. Joǵarǵy din qyzmetkerleri zorlyq-zombylyqty toqtatýǵa jáne bitimge kelý joldaryn izdeýge eshqandaı saıası reńksiz, beıtarap úndeý jasaý arqyly atalǵan qozǵalysqa moraldyq turǵydan demeý bola alar edi. Adam ómiriniń quny, janashyrlyq pen meıirbandyq sekildi jalpyǵa ortaq qundylyqtarǵa negizdelgen bul bastama dindar qaýymdy ǵana emes, saıasatkerlerdi, halyqaralyq uıymdar men memlekettik emes qurylymdar ókilderin, sarapshylardy, tipti jastardy da biriktire alady. Beıbitshilikti qorǵaý jolyndaǵy únimiz áldeqaıda órshil bolýy qajet. Osy Sezd sekildi alańdar soǵan septigin tıgizedi. Bul rette ázirge álemde balamasy joq Birikken Ulttar Uıymyna úlken senim artamyz», dedi Prezıdent.
Sonymen qatar Qasym-Jomart Toqaev Almatyda BUU-nyń Ortalyq Azııa men Aýǵanstanǵa arnalǵan Ornyqty damý maqsattary jónindegi óńirlik ortalyǵyn ashý týraly elimizdiń usynysyna qoldaý bildirgen Uıymǵa múshe barlyq memleketke rızashylyǵyn bildirdi.
Budan bólek, Prezıdent AО́SShK, Islam yntymaqtastyǵy uıymy, EQYU, Shanhaı yntymaqtastyq uıymy, Ońtústik-Shyǵys Azııa memleketteriniń assosıasııasy, Arab memleketteri lıgasy sekildi óńirlik qurylymdardyń rólin kúsheıtý qajet ekenin aıtty.