Májilistegi Ekologııa jáne tabıǵatty paıdalaný komıteti Pavlodar oblysynda «О́ńirdiń ekologııalyq qaýipsizdigi máseleleri» taqyrybynda kóshpeli otyrys ótkizdi, dep habarlaıdy Egemen.kz.
Sapar aıasynda depýtattar iri ónerkásipterdi, tazartý nysandaryn jáne tarıhı synapty lastaýmen baılanysty «Bylqyldaq» jınaqtaǵyshyn aralady.
Jıynda óndiristiń qorshaǵan ortaǵa áserin azaıtýǵa, tazartý júıelerin jańǵyrtýǵa, barlyq iri lastaýshy kásiporynǵa avtomattandyrylǵan monıtorıng júıelerin ornatýǵa jáne jınaqtalǵan ekologııalyq lastanýdyń saldaryn joıýǵa nazar aýdaryldy.
Komıtet tóraǵasy Edil Jańbyrshın Memleket basshysy óz joldaýlarynda ekologııa máselelerin árdaıym aıryqsha mán beretinin, qoǵamda ekologııalyq mádenıetti damytý jóninde naqty tapsyrmalar bergenin atap ótti.
«Komıtet josparyna Pavlodar oblysyna sapardy bekitýimiz beker emes. О́ıtkeni elimizdiń qorshaǵan ortasyna shyǵatyn lastaýshy shyǵaryndylardyń úshten birin osy óńir qurap otyr. Biz óńirdiń ekologııalyq máselelerinen jaqsy habardarmyz jáne olardy sheshýdi múddeli memlekettik organdarmen birlesip turaqty túrde talqylap kelemiz», dedi E.Jańbyrshın.
Ekologııa jáne tabıǵı resýrstar vıse-mınıstri Jomart Álıev respýblıkadaǵy jalpy shyǵaryndylardyń shamamen 30 paıyzy Pavlodar oblysyna tıesili ekenin aıtty. Ol iri kásiporyndardy eń ozyq qoljetimdi tehnıkalarǵa kóshirý men Ertis ózenin qorǵaýǵa arnalǵan tazartý qurylystaryn jańǵyrtý basym baǵyt ekenin alǵa tartty.
Degenmen Pavlodar oblysy ákiminiń orynbasary Áıgerim Qabyltaeva óńirdiń ındýstrııalyq júktemesi joǵary bolǵanyna qaramastan, qoljetimdi eń ozyq tehnıkalardy engizý jáne ekologııalyq sharalardy júzege asyrý nátıjesinde aýaǵa shyǵarylatyn zııandy zattardyń kólemi birtindep azaıyp kele jatqanyn jetkizdi.
Bul rette Pavlodar oblysynyń mamandandyrylǵan tabıǵat qorǵaý prokýrory Erlan Salhanov qabyldanǵan sharalar nátıjesinde tabıǵatty paıdalaný salasyndaǵy quqyqbuzýshylyqtardyń joly kesilgenin, sý jáne orman resýrstaryn qorǵaý kúsheıtilip, bıýdjetke kelýi múmkin eleýli shyǵyndarǵa tosqaýyl qoıylǵanyn aıtty.
Depýtattar «Bylqyldaq» jınaqtaǵyshyndaǵy synapty lastaný, ruqsat etilmegen qoqys úıindileri, Pavlodar, Aqsý jáne Ekibastuzdaǵy kárizdik tazartý qurylystarynyń tozýy, sondaı-aq oblys ortalyǵynda nóserlik-káriz júıesiniń bolmaýy, sonyń saldarynan Ertis ózeniniń ústińgi aǵymmen lastanýy máselelerin kóterdi. Bul túıtkildiń barlyǵy turǵyndardyń densaýlyǵyna, ekojúıeniń turaqtylyǵyna jáne óńirdiń áleýmettik damýyna tikeleı áser etetinine nazar aýdardy.
Komıtet tóraǵasy depýtattar bıýdjet zańnamasyna arnaıy túzetý engizgenin, endi ekologııalyq zańnamany buzǵan jer qoınaýyn paıdalanýshylardan óndirilgen aıyppuldar respýblıkalyq bıýdjetke emes, jergilikti bıýdjetke túsip, tikeleı sol óńirdiń ekologııalyq jaǵdaıyn jaqsartýǵa jumsalatynyn eske saldy.
«Bul óńirlerdiń ekologııalyq ahýalyn jaqsartýǵa naqty qarjylyq negiz qalyptastyratyn qadam dep esepteımin. Alda jylý elektr ortalyǵynyń kúlin, metallýrgııa shlaktary men shlamdaryn ekinshi rettik shıkizat etip bekitý, qurylys jáne jol kompanııalarynyń kúl men metallýrgııa qaldyqtaryn mindetti túrde qoldanýyn qadaǵalaý, óndiristik qaldyqtardy qurylysqa paıdalaný úshin yntalandyrý sharalaryn engizý sııaqty mindetter tur. Pavlodar, Aqsý jáne Ekibastuzdaǵy tozýy 83-85 paıyzǵa jetken káriz-tazartý qurylystaryn jańǵyrtý, zamanaýı polıgondar men qaıta óńdeý keshenderin salý, «Bylqyldaq» las sýlar qoımasyndaǵy tarıhı synapty lastanýdy joıý úshin álemdegi zamanaýı tehnologııalardy engizý jumystaryn da baqylaýǵa alatyn bolamyz», dedi E.Jańbyrshın.
Kóshpeli otyrys qorytyndysy boıynsha komıtet tóraǵasy memlekettik organdarmen jáne kásiporyndarmen bul baǵyttaǵy ózara is-áreketti jalǵastyrýǵa daıyn ekenin málimdedi. Negizgi tujyrymdar men usynystar ázirlenip, Úkimetke joldanatyn bolady.
Buǵan deıin óńirge sapary barysynda depýtattar «Pavlodar-Vodokanal» JShS-niń káriz-tazartý qurylystaryndaǵy jáne «Bylqyldaq» jınaǵyshyndaǵy ekologııalyq jaǵdaımen, sondaı-aq oblystyń iri kásiporyndary – Pavlodar munaı-hımııa zaýytynyń, Pavlodar alıýmınıı zaýytynyń jáne Qazaqstan elektrolız zaýytynyń jańǵyrtylýymen tanysty.