Búgin Astana qalasyndaǵy Úndistan Elshiligi Mahatma Gandıdiń týǵanyna 156 jyl tolýyn jáne BUU jarııalaǵan Zorlyq-zombylyqqa qarsy halyqaralyq kúndi Esil ózeniniń jaǵasyndaǵy Gandı eskertkishi janynda saltanatty túrde atap ótti, dep habarlaıdy Egemen.kz.
Eń aldymen M.Gandı eskertkishine gúl shoqtaryn qoıýmen bastalǵan is-sharaǵa Qazaqstan Respýblıkasyndaǵy Úndistan Respýblıkasynyń Elshisi Iа.K. Saılas Tangal, Astana qalasy ákiminiń orynbasary Erik Meıirhan, Qasıetti Taqtyń Elshisi Arhıepıskop Djordj Panamthýndıl, Venesýelanyń Qazaqstandaǵy Elshisi Rozalba Lo Býe Antıko, Baıqońyr aýdany ákiminiń orynbasary Azamat Malybaev, sondaı-aq dıplomatııalyq korpýs ókilderi, BAQ ókilderi, úndi qaýymdastyǵynyń músheleri, úndi stýdentteri qatysty.
Elshi Saılas Tangal Mahatma Gandıdi beıbitshilik pen zorlyq-zombylyqtan ada álemniń jaqtaýshysy retinde eske alyp, onyń «Meniń ómirim – meniń joldaýym» degen sóziniń adamzatqa baǵyt-baǵdar bolatynyn atap ótti. Ol Gandıdiń shyndyq, dinaralyq kelisim, turaqty ómir súrý men janashyrlyq sııaqty qundylyqtary qazirgi álemdegi qaqtyǵystar, teńsizdik jáne klımattyń ózgerýi sııaqty jahandyq syn-qaterlermen kúresýde erekshe ózektiligin aıtty.
Ol Qazaqstanda da Mahatma Gandıdiń murasyn joǵary baǵalap, Astana men Almaty qalalarynda eskertkishter, ál-Farabı atyndaǵy Qazaq ulttyq ýnıversıtetinde Úndistandy zertteý ortalyǵy, sondaı-aq Almatyda Mahatma Gandı murajaıy men mektebi qurylǵanyn aıtty. Bular Úndistan men Qazaqstan arasyndaǵy dostyq pen ortaq qundylyqtardyń tereń baılanysyn kórsetedi.
Is-shara barysynda Svamı Vıvekananda mádenı ortalyǵynyń (SVCC) qazaq stýdentteri men Úndistandyq stýdent Gandıdiń súıikti Bhadjan ánderin oryndady.