Muny kishkentaı júrekten shyqqan úlken ıgilik dep ataýǵa bolatyn shyǵar. Semeı qalasynda qazaqtyń eki qarshadaı qyzy kózi nashar kóretin jandarǵa arnalǵan mobıldi qosymsha ázirlep, talaıdyń júregin eriksiz tebirentti.
Búginde sıfrlyq tehnologııanyń adam ómiriniń barlyq salasyna enip, kúndelikti kúıbeń tirshilikti jeńildetip jatqan ıgiligi az emes. Biraq naǵyz progress – tehnıkalyq jetistik qana emes, adamǵa, ásirese erekshe qajettiligi bar jandarǵa paıdasy tıgizýge tıis. Jýyrda Semeı qalasyndaǵy №50 jalpy orta bilim beretin IT mektep-lıseıiniń 7-synyp oqýshylary Aıarý Raqymbekova men Aqbota Muratova «Helping Hand App» mobıldi qosymshasyn ázirlepti.
Bul qosymsha kórý qabileti tómen adamdardyń kúndelikti ómirin jeńildetýge baǵyttalǵan. «MIT App Inventor» platformasynda jasalǵan joba daýystyq habarlamalar arqyly aqparat berip, paıdalanýshyǵa kúndelikti tapsyrmalardy oryndaýǵa kómektesedi eken. Interfeısi qarapaıym, basqarý júıesi yńǵaıly. Telefonǵa QR-kod arqyly ońaı ornatylady.
– Bul joba biz úshin tek tehnologııalyq tájirıbe emes. Biz eń aldymen adamdarǵa paıdasy tısin dep oıladyq. Aldaǵy ýaqytta qosymshany jetildirip, qoldanys aıasyn keńeıtýdi josparlap otyrmyz, – deıdi oqýshylar.
Jas ónertapqyshtardyń jetekshisi, ınformatıka pániniń muǵalimi Aınur Sarǵyzova shákirtteriniń yntasy men jaýapkershiligi joǵary ekenin aıtady.
– Olar oıǵa alǵanyn iske asyrý úshin kóp izdendi. Baǵdarlamalaýdy, ınterfeıs qurýdy, dybystyq habarlamalar júıesin úırendi. Mundaı jobalar balalardyń adamgershilik pen jańashyldyqty qatar ustaýǵa úıretedi, – deıdi pedagog.
Mundaı ıgi bastamalardy nasıhattaý – elimizdegi ǵylym salasyn damytýǵa serpin beretini ras. О́ıtkeni biz keıde bolymsyz nárseni talqylap, shyn mánindegi izgi isterdi elemeı jatamyz. Al kishkentaı bolsa da bir jańalyq oılap taýyp, ózgelerdiń ómirin jeńildetýge talpynǵan balalardyń eńbegi baǵalaýǵa turarlyq.
Mektep qabyrǵansynda osyndaı jańalyqtar ashý úshinde tehnıkalyq múmkindik mol bolýǵa tıis. Semeı qalasyndaǵy bul mektepke KAZ Minerals kompanııasy jalpy quny 24 mlnnan astam qarjylaı qoldaýymen 11 kásibı montaj kompıýteri, 5 robototehnıka stoly, robottyq baǵdarlamalardyń synaq alańdary, ortańǵy synyptarǵa arnalǵan jabdyqtar, bastaýysh synyptarǵa arnalǵan arnalǵan synaq alańdary, ǵylymı jobalarǵa arnalǵan 100 arnaıy jınaq, bes arnaıy baǵdarlamaǵa arnalǵan noýtbýk, shtatıvter, kásibı jaryq, mıkrofondar, kásibı kamera, dron, dron-ressıng jabdyqtary, eresek synyptarǵa arnalǵan robototehnıkanyń bastapqy, qosalqy jáne qurastyrýshy jınaqtary syıǵa berildi.
«Barlyq syılyqty jastaryna qaraı birneshe kásibı synyptarǵa bólip taratý josparlanyp otyr. Mýltımedıa kabınetindegi ár qabyrǵa podkasttarǵa, mektep jańalyqtary men aıdarlarǵa arnalyp daıyndalýda», deıdi mektep dırektory.
Onyń aıtýynsha, mektepte ınformatıkany oqytatyn 11 ustaz bar. Olar oqýshylarmen qosymsha robototehnıka, 3D-modeldeýmen aınalysady. Balalar topta jáne oqýdan tys dáristerde belsendi oqyp, jaqsy nátıje kórsetip júr. Bıyl joǵary topta saıystarǵa qatysatyn eki komanda daıyndaý jáne robotehnıkanyń basqa saıysyna qatysatyn taǵy eki komanda jasaqtaý, sol arqyly jarystardyń halyqaralyq kezeńine shyǵý josparda eken.
Abaı oblysy