Sáýir aıynda bastalǵan «Qazaqstan áýesqoı lıgasy» máresine jetti, dep jazady Egemen.kz.
Kóktemde jalaýy jelbiregen áýesqoılar lıgasyna ár óńirdegi irikteýde 277 komanda dodaǵa tússe, solardyń arasynan úzdik shyqqan 20 úzdik komanda fınaldyq kezeńde tartysty jalǵastyrdy. Jalpy lıganyń oıyndaryna 6500-den astam áýesqoı oıynshy qatysty.
Taldyqorǵan qalasynda chempıondyq ataq úshin ótken saıys asa tartysty órbidi. Oraldyq JelaevNAN jáne almatylyq BKS komandasynyń oıynshylary fınalda baryn salyp oınady. Match 2:2 esebimen aıaqtalyp, penaltı serııasynda BKS komandasy jeńiske jetip, Qazaqstan áýesqoı lıgasynyń alǵashqy chempıony atandy.
Qazaqstan áýesqoı lıgasynyń erejesine sáıkes, jeńiske jetken komandaǵa kásibı fýtbolǵa shyǵýǵa jol ashylady. Endi olar ÝEFA-nyń Aımaqtar kýbogynda el senimin arqalap, dodaǵa qosylady. Odan bólek fınalǵa shyqqan bul eki komanda endi 2026 jylǵy Qazaqstan Kýbogy men Ekinshi lıgaǵa qatysý múmkindigine ıe boldy.
Alty aıǵa sozylǵan saıysta ádil oıyn kórsetkeni úshin arnaıy «Adal» júldesi Qaraǵandy oblysynan kelgen «Abaı» komandasyna berildi. Týrnırde arnaıy nomınasııa boıynsha birneshe fýtbolshylar marapattaldy. Atap aıtqanda:
«Úzdik surmergen»: Elaman Qaldybek («NDFZ», Taraz)
«Altyn bala» (úzdik jas oıynshy): Dáýlet Dosanov («Naıza», Aqmola oblysy)
«Úzdik qaqpashy»: Roman Bagaýtdınov (JelaevNAN, Oral)
«Úzdik qorǵaýshy»: Aleksandr Kıslısyn (RB Arman, Pavlodar)
«Úzdik jartylaı qorǵaýshy»: Aıdyn Metallov (Barqy, Semeı)
«Úzdik shabýylshy»: Roman Pavınıch (BKS, Almaty)
«Úzdik basshy»: Kenjaly Aıdarov («NDFZ», Taraz)
«Sheber» (Tájirıbeli úzdik oıynshy): Dastan Aımanov (Barqy, Semeı)
Týrnırdiń eń úzdik oıynshysy: Álı Saýranbaev (BKS, Almaty)
Fınaldyń MVP-si: Yqylas Mahambetov (JelaevNAN, Oral)
Nursultan Álibekov (Pavlodar), Ilashbek Orynbaev (Shymkent), Vıktor Stasenko (Taldyqorǵan) bastaǵan qazylar «Úzdik tóreshi» dep tanyldy.