Astanada qazir álemge áıgili sýretshi Pablo Pıkassonyń biregeı týyndylarynyń kórmesi ótip jatyr. Halyqaralyq «Lumiere-Hall» mýzeıi uıymdastyrǵan kórmege Germanııa, Belgııa jáne Fransııanyń jeke kolleksııalarynan alynǵan sheberdiń 51 lıtografııasy qoıylǵan.
Ataqty sýretshiniń áıgili týyndylaryn elge jetkizý ońaıǵa soqpaǵan. Bul jumystardy mýzeı bir jylǵa jýyq kútip, jalǵa alý arqyly ákelipti.
«Pıkasso kózi tirisinde óte tanymal boldy, kezinde onyń eńbekterine «quda túspegen» kisi kemde-kem. Sýretshi maıly boıaýmen bárin úlgerip jaza almaıtyn edi. Sol sebepti lıtografııa – arnaıy stanok arqyly jasalatyn basylym, qazirgi tilmen aıtqanda prınt, erekshe mańyzǵa ıe. О́ıtkeni bular shekteýli serııamen shyǵady, sýretshiniń qoltańbasymen rásimdeledi, al álemde mundaıdy jasaıtyn birneshe ǵana kompanııa bar», deıdi «Lumiere-Hall» mýzeıiniń teń quryltaıshysy Maksım Egarmın.
Kolleksııanyń qundylyǵy – Pıkasso shyǵarmashylyǵynyń ártúrli kezeńderin qamtıtynynda. Onda klassıkalyq mektepten bastap mınımalızm men kýbızmge deıingi izdenister kórinis tapqan.
Kórmede «Barselonanyń kógildir túsi» atty kúndelikti ómir kórinisterine arnalǵan serııa, sondaı-aq ataqty «Gernıka» kartınasyn jasaý barysyn sıpattaıtyn materıaldar usynylǵan. «Pape-kolle» bólimi sýretshiniń kýbızmge kózqarasyn ashady, al jeke bólim Pıkassonyń soǵystan keıingi kezeńdegi korrıda taqyrybyna qyzyǵýshylyǵyna arnalǵan. Ekspozısııa «Soǵys jáne beıbitshilik» serııasymen túıindeledi.
Buǵan deıin kórme Almatyda ótken. Egarmınniń aıtýynsha, onda kórermender arasynda eń kóp qyzyǵýshylyq týdyrǵany – Pıkasso áıelderiniń portretteri.
Astanadaǵy kórmeni 9 qarashaǵa deıin «Kulanshi Art» galereıasynan tamashalaýǵa bolady.