Dúnıejúzilik týrızm kúni jyl saıyn 27 qyrkúıekte atap ótiledi. Bul mereke 1979 jyly Búkilálemdik týrıstik uıymnyń sheshimimen bekitilip, 1980 jyldan bastap resmı túrde toılanyp keledi. Merekeniń basty maqsaty – týrızmniń áleýmettik, mádenı, saıası jáne ekonomıkalyq mańyzyn arttyrý, adamdardy jańa jerlerdi tanýǵa jáne mádenıetter arasyndaǵy ózara túsinistikti damytýǵa shaqyrý.
Ulttyq statıstıka bıýrosynyń derekterine súıensek, 2024 jyly Qazaqstanǵa 1,3 mıllıon sheteldik týrıst kelgen. Bul kórsetkish 2023 jylmen salystyrǵanda 19%-ǵa joǵary. Mundaı ósim Qazaqstannyń týrızm salasyna degen qyzyǵýshylyqtyń artyp kele jatqanyn aıqyn kórsetedi.
Halyqaralyq qaýymdastyq ta Qazaqstandaǵy oń ózgeristerdi atap ótýde. Dúnıejúzilik ekonomıkalyq forýmnyń Saıahat jáne týrızmdi damytý ındeksi boıynsha elimiz 119 memlekettiń ishinde 52-orynǵa ıe boldy. Bul – 2021 jylmen salystyrǵanda alty saty joǵary nátıje. Aıta keterligi, Qazaqstan bul kórsetkishte Ortalyq Azııa elderiniń arasynda aldyńǵy orynda: О́zbekstan – 78-orynda, Tájikstan – 99-orynda, al Qyrǵyzstan – 102-orynda.
Týrızm – ekonomıkanyń mańyzdy salalarynyń biri. Ol jańa jumys oryndaryn ashyp, shaǵyn jáne orta bıznesti damytýǵa múmkindik beredi.
Qazaqstanda týrızm erekshe qarqynmen damyp keledi. Eldiń baı tabıǵaty, tarıhı muralary men qonaqjaı halqy sheteldik jáne ishki týrıster úshin tartymdy baǵytqa aınalýda.
Búgingi tańda elimizde ekotýrızm, mádenı-tanymdyq, taý týrızmi, etnotýrızm jáne shytyrman saıahat baǵyttary belsendi damýda. Týrızm kúni – osy salanyń mamandaryn, gıdter men týroperatorlardy, sondaı-aq saıahat súıer qaýymdy biriktiretin erekshe mereke.
Saıahattaý – jańa áser, jańa adamdar jáne jańa ıdeıalar álemine jol ashady. Bul kún árqaısymyzdy týǵan jerimizdiń sulýlyǵyn tanýǵa, tabıǵatty qorǵaýǵa jáne álem mádenıetteriniń baılyǵyn qurmetteýge úndeıdi.