Mádenıet jáne aqparat mınıstrligi qoǵamdyq kelisim, azamattyq birlik jáne etnosaralyq qatynastardy damytý baǵytyndaǵy jumystardy júıeli túrde jalǵastyryp keledi, dep habarlaıdy Egemen.kz atalǵan mınıstrliktiń baspasóz qyzmetine silteme jasap.
Búginde elimizde júzden astam etnostyń ókilderi beıbitshilik pen kelisim jaǵdaıynda ómir súrip jatyr. Olardy teń múmkindikterge negizdelgen jáne turaqty damýǵa baǵyttalǵan Ádiletti Qazaqstandy qurý jónindegi ortaq maqsat biriktiredi.
Etnosaralyq kelisimdi nyǵaıtýǵa baǵyttalǵan memlekettik saıasatty iske asyrýdyń tıimdi ınstıtýsıonaldyq júıesi qalyptasty. Bul júıe ortalyq memlekettik organdardan bastap óńirlik Qazaqstan halqy assambleıalaryna deıin barlyq deńgeıde jumys isteıdi.
Etnosaralyq qatynastardyń damý deńgeıin zerdeleý jáne praktıkalyq usynymdar ázirleý maqsatynda óńirlerde turaqty túrde áleýmettik zertteýler men monıtorıngtik saparlar júrgizilip jatyr.
2025 jyly qoǵam tarapynan etnosaralyq saıasatqa degen senim deńgeıi joǵary ekenin kórsetetin derek tirkeldi. Azamattardyń 95 paıyzdan astamy eldegi etnosaralyq ahýaldy turaqty ári qolaıly dep baǵalap otyr.
2022 jylǵy sáýirden bastap kásibı etnomedıatorlardy daıarlaý jáne medıasııa ınstıtýtyn damytý maqsatynda Etnomedıasııa ortalyǵy jumys isteıdi.
Etnosaralyq salada túsindirý jumystaryn kúsheıtý úshin respýblıkalyq aqparattyq-túsindirý toby quryldy. Qazirgi ýaqytta elimizde 80 aqparattyq-túsindirý toby belsendi qyzmet atqarýda.
Qazaqstan halqy Assambleıasynyń bastamasymen 1000-nan astam etnomádenı birlestik pen 4000-ǵa jýyq qoǵamdyq qurylym biriktirilgen. Olardyń qyzmetine 50 myńnan astam azamat tartylǵan. Qoǵamdyq ómirge halyqty keńinen jumyldyrýda «Aqsaqaldar keńesi» men «Analar keńesi» mańyzdy ról atqaryp keledi. Otbasylyq qundylyqtardy nyǵaıtý jáne jastardy rýhanı-adamgershilik turǵydan tárbıeleýge baǵyttalǵan «Mádenıetti ana – mádenıetti ult», «Adal azamat» jáne «Salaýatty sana» jobalary tabysty júzege asyrylyp jatyr.
2025 jyly alǵash ret Almaty, Jambyl, Túrkistan, Jetisý oblystarynda aýdandyq deńgeıdegi assambleıalar quryldy.
«Assambleıa jastary» jastar qanaty 10 myńnan astam jas ókilin biriktirip, mádenıetter arasyndaǵy dıalogty damytýǵa baǵyttalǵan bastamalardy iske asyryp jatyr. Jastar uıymynyń «Jańa tolqyn», «Shkola lıderov ANK», «50 jas kóshbasshy» sııaqty jobalary tabysty júzege asyp keledi. Sonymen qatar, elimizdiń joǵary oqý oryndarynda túrli etnos ókilderimen jumys júrgizetin Stýdenttik assambleıa jumys isteıdi. Ol etnosaralyq kelisim men azamattyq biregeılikti nyǵaıtýǵa, sondaı-aq volonterlik qozǵalys pen etnomedıasııa baǵytyn damytýǵa óz úlesin qosyp otyr.
Respýblıka boıynsha 32 Dostyq úıi jumys isteıdi. 2025 jyly Qyzylorda, Atyraý, Abaı oblystarynda jańa Dostyq úıleriniń qurylysy bastaldy.
«Jomart jan» qaıyrymdylyq ortalyǵy, «Jeńis birlikte» sporttyq alańy jáne «Eltaný» jobasy belsendi túrde damyp keledi. Bıyl «Jomart jan» ortalyǵynyń mesenattary 35 myń azamatqa 305 mıllıon teńge kóleminde kómek kórsetti.
Ǵylym men bilimdi damytý maqsatynda joǵary oqý oryndarynda Assambleıanyń 42 kafedrasy jumys isteıdi. 360 sarapshyny biriktiretin Ǵylymı-saraptamalyq keńes pen Jas ǵalymdar klýby zertteý qyzmetin jandandyryp jatyr.
Elimizde 11 tilde 50-den astam gazet pen jýrnal jaryq kóredi. Alǵash ret Qazaqstannyń 14 joǵary oqý ornynda oqý baǵdarlamasyna «Etnosaıası saýattylyq» kýrsy engizildi. Qazaqstan halqy Assambleıasynyń jýrnalıster klýby 500-ge jýyq buqaralyq aqparat quraldarynyń ókilderi men medıa salasynyń mamandaryn biriktiredi.
170-ten astam ansambldi qamtıtyn Assambleıanyń shyǵarmashylyq ujymdary qaýymdastyǵy quryldy. Sonymen qatar, 4 etnokonfessııalyq teatr jumys isteıdi jáne mádenı is-sharalardyń biryńǵaı kúntizbesi júzege asyryldy.
2023 jyly ádebıet, jýrnalıstıka, mádenıet jáne óner salasyndaǵy jetistikter úshin arnaıy syılyqtar taǵaıyndaldy. Sondaı-aq, jalpyulttyq birlikti nyǵaıtýǵa qosqan aıryqsha úlesi úshin «El birligi» ordenimen marapattaý tártibi bekitildi.
Qazaqstannyń etnosaralyq kelisim tájirıbesi halyqaralyq arenada joǵary baǵalandy. Qazaqstan halqy Assambleıasy janynda elimizdiń beıbitshilik modelin shetelde ilgeriletýge baǵyttalǵan Halyq dıplomatııasy ortalyǵy jáne Dostyq elshiler korpýsy jumys isteıdi.
«Assambleıa jastary» uıymy IýNESKO men Eýropa Keńesiniń halyqaralyq jastar qurylymdaryna múshe bolyp, óz bastamalaryn Parıjdegi IýNESKO shtab-páterinde tanystyrdy.
Qazaqstan qoǵamdaǵy kelisim men birlikke negizdelgen, ózara qurmet, kópmádenıettilik jáne tózimdilik qaǵıdattaryna súıenetin biregeı úlgi qalyptastyrdy. Bul úlgi memlekettiń turaqtylyǵy men turaqty damýynyń negizgi faktorlarynyń birine aınaldy.
Qazaqstan halqy Assambleıasynyń 30 jyldyǵy bıylǵy mańyzdy oqıǵalardyń biri boldy. Mereıtoı aıasynda 10 myńnan astam áleýmettik mańyzy bar is-shara uıymdastyrylyp, olar mıllıonnan astam azamatty qamtydy.