Jetisý oblysynda Olımpıada chempıondary men júldegerleri, sport ardagerleri jastarmen kezdesti. Jyly shyraıly júzdesý «Buqaralyq sport – bolashaq jeńisterdiń bastaýy» sporttyq is-sharasynyń aıasynda ótkizildi.
Jetisý oblysy ákiminiń baspasóz qyzmeti habarlaǵandaı, Taldyqorǵandaǵy «Jastar» sport saraıyna Olımpıada juldyzdary Ermahan Ibraımov, Olga Shıshıgına, Iýrıı Melnıchenko, Evgenıı Iаrovenko, Sergeı Kotenko, Máýlen Mamyrov, Vladımır Vohmıanın, el fýtbolynyń aty ańyzǵa aınalǵan qaqpashysy Quralbek Ordabaev, basqa da sport sańlaqtary keldi. Buqaralyq sportty nasıhattaý, jastardyń salamatty ómir saltyn ustanýǵa, dene shynyqtyrýǵa degen qyzyǵýshylyǵyn oıatý maqsatynda uıymdastyrylǵan kezdesýge oblystaǵy balalar men jasóspirimder sport mektepteriniń tárbıelenýshileri, jattyqtyrýshylary, jalpy bilim beretin mektepterdiń sport úıirmelerine qatysatyn oqýshylary men ata-analar qatysty.
Sharanyń ashylýynda sóz sóılegen oblys ákimi Beıbit Isabaev qonaqtarǵa jyly tilegin bildirip, is-shara Memleket basshysynyń buqaralyq sportqa mańyz berý týraly tapsyrmasyna sáıkes ótkizilip otyrǵanyn jetkizdi.
– Jetisýdyń jas sportshylary, sizderdiń aldaryńyzda Olımpıada chempıondary otyr. Bir kezderi olar da sizder sııaqty úlken armanǵa umtylǵan jas bala bolǵan. Búginde bizdiń olımpıadashylardyń úlgisi sizderge myqty motıvasııa bolady, ómirlik ónegesi men eńbekqorlyq qasıetteri sizderdiń júrekterińizge jiger men jalyn uıalatady dep senemin, – dedi B.Isabaev.
Munan soń qonaqtar kezekpen sóz alyp, jas sportshylarǵa aqyl-keńesteri men tilekterin bildirdi. Sportshyǵa kerekti basty qasıetterdi atap, sharshamaı eńbektenýge shaqyrdy.
– Búgin osy zalda otyrǵan balalardyń ishinen bálkim 5-10 jyldan keıin álem chempıony, Olımpıada júldegeri shyǵýy ábden múmkin. Biz de úlken jeńisti bala kúnimizden armandadyq. Serik Qonaqbaev, Shámil Serikovterdi teledıdardan kórip, sol kisilerge eliktep óstik. Jaı armandap qoıý az, eń bastysy ter tógý kerek. Bul jolda eń úlken qarsylas – óziń. О́zin, óziniń jalqaýlyǵyn jeńgen adam mindetti túrde chempıon bolady, – dedi bokstan Sıdneı Olımpıadasynyń chempıony Ermahan Ibraımov.
Máskeýdegi Olımpııa oıyndarynyń chempıony, vaterpolshy Sergeı Kotenko:
– Búgin sizderdiń aldaryńyzda sporttyń qaı túrinen bolsyn jeńistiń shyńyna shyqqan azamattar kelip otyr. Qaı-qaısynan da úlgi alýlaryńyzǵa bolady. Jalpy, júregiń qalaıtyn sporttyń túrimen aınalysý kerek, sonda nátıje shyǵady. Qazir tegin seksııalar kóp, sportpen aınalysýǵa barlyq múmkindik jasalǵan. Sondyqtan myqty sportshy bolý eń birinshi ózderińe baılanysty. Jetisý jeri – burynnan talantty sportshylarymen tanylǵan óńir. Aldaǵy ýaqytta da osy ólkeden álemdi moıyndatatyn chempıondar shyǵady dep oılaımyn, – dedi.
Budan ári kezdesý jasóspirimderdiń sportshylarǵa ózderin qyzyqtyrǵan saýaldaryn qoıyp, pikir almasýymen jalǵasty. Sport juldyzdary boks qolǵaby, fýtbol doby sııaqty sporttyq quraldarǵa óz qoltańbalaryn qoıyp, balalarmen birge estelik sýretke tústi. Balalar da búgingi sharadan alǵan áseri erekshe ekenin aıtty.
– О́zim Taldyqorǵandaǵy №18 mektepte 6-synypta oqımyn. Eki jyldan beri júzýmen aınalysamyn, oǵan qosa ústel tennısi úıirmesine baryp júrmin. Maǵan sportpen aınalysqan unaıdy. Búgin Olımpıada chempıondary keledi degen soń olardy júzbe-júz kórip, sporttaǵy ómiri týraly tyńdaýǵa asyqtym, kelgenime qatty qýanyp otyrmyn. Ol kisilerdiń jeńis jolyndaǵy túrli oqıǵalaryn, jattyǵýdaǵy tabandylyqtary týraly áńgimelerdi óz aýyzdarynan estidik. Eger bolashaqta sportshy bolýdy tańdasam, osy kisiler sııaqty chempıon bolǵym keledi, – deıdi Ramazan Jumabek.
Jetisýdyń aýdan-qalalaryndaǵy 23 sport mektebinde 23 myńnan astam tárbıelenýshi sporttyń 61 túrimen shuǵyldanady. О́ńirde dene shynyqtyrý, sportpen aınalysatyn adamdar oblys halqynyń 42 %-yn quraıdy. Jalpy, osy jyldyń basynan beri óńir sportshylary respýblıkalyq, halyqaralyq deńgeıli jarystarda myńnan astam medal jeńip alǵan.