2025 jylǵy 22 qazanda Qazaqstan Respýblıkasy Ortalyq saılaý komıssııasynyń janyndaǵy Múgedektigi bar adamdardyń saılaý quqyqtaryn qamtamasyz etý jónindegi jumys tobynyń kezekti otyrysy ótti, dep jazady Egemen.kz.
Otyrysty ashqan Nurlan Ábdirov ınklıýzıvtilik pen saılaýshylardyń teń quqyqtaryn qamtamasyz etý máselesi memlekettik saıasattyń basym baǵyttarynyń biri ekenin atap ótti.
«Birlesken nátıjeli áriptestiktiń arqasynda biz shynymen qoljetimdi jáne ınklıýzıvti saılaý júıesin qalyptastyrý jolynda júıeli túrde ilgerilep kelemiz», - dedi ol.
Túrli deńgeıdegi saılaýlarda múgedektigi bar azamattardyń daýys berýi úshin barlyq qajetti jaǵdaılar jasalýda: kórý qabileti nashar saılaýshylarǵa arnalǵan trafaretter ázirlenip, arbamen júretin adamdarǵa beıimdelgen kabınalar ornatylǵan, saılaý rásimderin túsindiretin aýdıomaterıaldar daıyndalǵan jáne ınvataksı qyzmeti kórsetiledi.
Otyrys qorytyndysymen OSK men QR Eńbek jáne halyqty áleýmettik qorǵaý mınıstrligi arasynda múgedektigi bar adamdardyń saılaý quqyqtaryn qamtamasyz etý jónindegi aldaǵy sharalardy kózdeıtin Jol kartasyna qol qoıyldy. Jol kartasyndaǵy jańashyldyqtardyń biri – saılaý ýchaskeleriniń ashyqtyǵy men qoljetimdiligin arttyrýǵa baǵyttalǵan inva.gov.kz portalyn kezeń-kezeńimen sıfrlandyrý bolmaq.
Qatysýshylar Astanadaǵy EQYU Baǵdarlamalar ofısi men «Shyraq» múgedektigi bar áıelder assosıasııasy» qoǵamdyq birlestigi birlesip ázirlegen múgedektigi bar adamdardyń saılaý quqyqtary men qajettilikterine arnalǵan beınekýrsqa erekshe nazar aýdardy.
Beınekýrs www.election.gov.kz saıtynda ornalastyrylǵan jáne barlyq saılaý komıssııalarynyń músheleri úshin mindetti bolyp tabylady.